Get Adobe Flash player
Untitled Document

كەناڵێ قورئانا پیروز

سەرەدانێت ماڵپەری

ته‌فسیرا سورەتا (البقرة) ئایەت (142-157)

خواندنا قورئانێ (سعد الغامدي) – راڤەكرن (تحسين إبراهيم دوسكي) _ داونلوود

 سَيَقُولُ السُّفَهَاءُ مِنَ النَّاسِ مَا وَلَّاهُمْ عَن قِبْلَتِهِمُ الَّتِي كَانُوا عَلَيْهَا ۚ قُل لِّلَّهِ الْمَشْرِقُ وَالْمَغْرِبُ ۚ يَهْدِي مَن يَشَاءُ إِلَىٰ صِرَاطٍ مُّسْتَقِيمٍسورة البقرة - عدد الآيات 286 - الآية 142

(142) مرۆڤێن نه‌زان وعه‌قل سڤك ژ جوهییان ویێن وه‌كى وان، ب تڕانه‌ وخۆنه‌ڕازیكرن ڤه‌ دێ بێژن: ئه‌و چ تشت بوو يێ به‌رێ ڤان موسلمانان ژ ڕووگه‌ها وان، يا وان ل ده‌ستپێكا ئيسلامێ به‌رێ خۆ ددايێ -كو به‌يتولمه‌قدس بوو- وه‌رگێڕاى؟ ئه‌ى پێغه‌مبه‌ر تو بێژه‌ وان: ڕۆژهه‌لات وڕۆژئاڤا وهه‌ر تشته‌كێ د ناڤبه‌را وان هه‌ر دووان دا ملكێ خودێیه‌، ولايه‌ك ژ لايان ژ ملكێ وى یێ ده‌ركه‌فتى نينه‌، هه‌چیيێ وى بڤێت ژ به‌نییێن خۆ ئه‌و به‌رێ وى دده‌ته‌ ڕێكا هيدايه‌تێ يا ڕاست. و د ڤێ چه‌ندێ دا ئاگه‌هداركرنه‌ك هه‌يه‌ كو مه‌سه‌له‌ هه‌مى بۆ خودێیه‌، كو مرۆڤ پێگيرییێ ب فه‌رمانێن وى بكه‌ت، وهه‌ر جهه‌كێ ئه‌و به‌رێ مه‌ بده‌تێ ئه‌م دێ به‌رێ خۆ ده‌ينێ.

وَكَذَٰلِكَ جَعَلْنَاكُمْ أُمَّةً وَسَطًا لِّتَكُونُوا شُهَدَاءَ عَلَى النَّاسِ وَيَكُونَ الرَّسُولُ عَلَيْكُمْ شَهِيدًا ۗ وَمَا جَعَلْنَا الْقِبْلَةَ الَّتِي كُنتَ عَلَيْهَا إِلَّا لِنَعْلَمَ مَن يَتَّبِعُ الرَّسُولَ مِمَّن يَنقَلِبُ عَلَىٰ عَقِبَيْهِ ۚ وَإِن كَانَتْ لَكَبِيرَةً إِلَّا عَلَى الَّذِينَ هَدَى اللَّهُ ۗ وَمَا كَانَ اللَّهُ لِيُضِيعَ إِيمَانَكُمْ ۚ إِنَّ اللَّهَ بِالنَّاسِ لَرَءُوفٌ رَّحِيمٌسورة البقرة - عدد الآيات 286 - الآية 143

(143) وكانێ چاوا مه‌ د ده‌ینى به‌رێ هه‌وه‌ -گه‌لى موسلمانان- دا ڕێكا ڕاست، وه‌سا مه‌ هوين كرنه‌ ملله‌ته‌كێ باش ودادكه‌ر؛ دا هوين ل ئاخره‌تێ شاهده‌يیێ ل سه‌ر ملله‌تان بده‌ن كو پێغه‌مبه‌رێن وان په‌يامێن خودايێ خۆ گه‌هاندبوونه‌ وان، هـه‌ر وه‌سا دا پێغه‌مبه‌ر ژى ل ئاخره‌تێ ل سه‌ر هه‌وه‌ ببته‌ شاهد كو وى په‌ياما خودايێ خۆ گه‌هاندبوو هه‌وه‌. ومه‌ ڕووگه‌ها به‌یتولمه‌قدس ئه‌وا ته‌ -ئه‌ى پێغه‌مبه‌ر- به‌رێ خۆ ددایێ دانا، پاشى به‌رێ ته‌ ژێ وه‌رگێڕا كه‌عبێ ل مه‌كه‌هێ، دا ئه‌و تشتێ مه‌ د ئه‌زه‌ل دا زانى ديار ببت، زانینه‌كا خه‌لات وجه‌لات پێڤه‌ گرێدایى؛ دا ئه‌م ئاشكه‌را بكه‌ین كانێ كى دێ دويچوون وگوهدارییا ته‌ كه‌ت، و د گه‌ل ته‌ به‌رێ خۆ ده‌ته‌ وى جهى یێ تو به‌رێ خۆ دده‌يێ، وكانێ كى خودانێ باوه‌رییه‌كا لاوازه‌ و ژ به‌ر گومان ودوڕوویاتییا خۆ دێ ژ دينێ خۆ ڤه‌گه‌ڕيێت. وهندى ئه‌ڤ كاره‌يه‌ كو ڤه‌گوهاستنا ڕووگه‌ها موسلمانییه‌ ژ به‌یتولمه‌قدسێ بۆ كه‌عبێ، كاره‌كێ مه‌زن و ب زه‌حمه‌ت بوويه‌ ل سه‌ر وان نه‌بت يێن خودێ ئه‌و ب هيدايه‌ت ئيناين و ب باوه‌رى وته‌قوایێ مننه‌ت لێ كرى. ونه‌بوويه‌ كو خودێ باوه‌رییا هه‌وه‌ ب وى ودويكه‌فتنا هه‌وه‌ بۆ پێغه‌مبه‌رێ وى به‌رزه‌كه‌ت، ونڤێژێن هه‌وه‌ بۆ ڕووگه‌ها به‌رێ كرین پويچ بكه‌ت، هندى ئه‌وه‌ ئه‌و ره‌حمه‌كا به‌رفره‌هـ ل دنیایێ وئاخره‌تێ ب مرۆڤان دبه‌ت.

قَدْ نَرَىٰ تَقَلُّبَ وَجْهِكَ فِي السَّمَاءِ ۖ فَلَنُوَلِّيَنَّكَ قِبْلَةً تَرْضَاهَا ۚ فَوَلِّ وَجْهَكَ شَطْرَ الْمَسْجِدِ الْحَرَامِ ۚ وَحَيْثُ مَا كُنتُمْ فَوَلُّوا وُجُوهَكُمْ شَطْرَهُ ۗ وَإِنَّ الَّذِينَ أُوتُوا الْكِتَابَ لَيَعْلَمُونَ أَنَّهُ الْحَقُّ مِن رَّبِّهِمْ ۗ وَمَا اللَّهُ بِغَافِلٍ عَمَّا يَعْمَلُونَسورة البقرة - عدد الآيات 286 - الآية 144

(144) ب ڕاستى ئه‌م یێ وه‌رگێڕانا ڕوويێ ته‌ -ئه‌ى پێغه‌مبه‌ر- جاره‌كێ ل دویڤ جاره‌كێ ب بال عه‌سمانى ڤه‌ دبينين؛ ل وێ هيڤییێ كو خودێ وه‌حییێ بۆ ته‌ د مه‌سه‌لا ڕووگه‌هێ دا بينته‌ خوارێ، ڤێجا ئه‌م دێ به‌رێ ته‌ ده‌ینه‌ ژ به‌یتولمه‌قدسێ وه‌رگێڕینه‌ ڕووگـه‌هــه‌كــا تــه‌ پــێ خۆش بت، كو مزگه‌فتا حه‌رامه‌ ل مه‌كه‌هێ، ڤێجا تو به‌رێ خۆ ب لايێ وێ ڤه‌ بده‌، وهه‌ر جهه‌كێ هوين -گه‌لى موسلمانان- لێ بن، وهه‌وه‌ ڤيا نڤێژێ بكه‌ن، هوين به‌رێ خۆ بده‌نه‌ مزگه‌فتا حه‌رام. وهندى ئه‌ون يێن خودێ زانينا كيتابێ دايێ ژ جوهى وفه‌لان، ئه‌و باش دزانن هندى به‌رێخۆدانا ته‌يه‌ بۆ كه‌عبێ ئه‌وه‌ حه‌قییا بنه‌جهـ د كيتابێن وان دا. وخودێ يێ بێ ئاگه‌هـ نينه‌ ژ كارێ ئه‌و دودل وگومانبه‌رێن هه‌ دكه‌ن، وئه‌و جزايێ وان سه‌را وێ چه‌ندێ دێ ده‌تێ.

وَلَئِنْ أَتَيْتَ الَّذِينَ أُوتُوا الْكِتَابَ بِكُلِّ آيَةٍ مَّا تَبِعُوا قِبْلَتَكَ ۚ وَمَا أَنتَ بِتَابِعٍ قِبْلَتَهُمْ ۚ وَمَا بَعْضُهُم بِتَابِعٍ قِبْلَةَ بَعْضٍ ۚ وَلَئِنِ اتَّبَعْتَ أَهْوَاءَهُم مِّن بَعْدِ مَا جَاءَكَ مِنَ الْعِلْمِ ۙ إِنَّكَ إِذًا لَّمِنَ الظَّالِمِينَسورة البقرة - عدد الآيات 286 - الآية 145

(145) وئه‌گه‌ر تو -ئه‌ى پێغه‌مبه‌ر- بۆ وان ئه‌وێن ته‌ورات وئنجيل بۆ هاتى، هه‌ر نيشانه‌كا هه‌ى بينى ل سه‌ر هندێ كو به‌رێخۆدانا ته‌ بۆ كه‌عبێ د نڤێژێ دا حه‌قییا ژ نك خودێیه‌، ئه‌و -ژ دفنبلندى وعیناد- به‌رێ خۆ ناده‌نه‌ ڕووگه‌ها ته‌، وتو ژى جاره‌كا دى به‌رێ خۆ ناده‌يه‌ ڕووگه‌ها وان، وهنده‌ك ژ وان به‌رێ خۆ ناده‌نه‌ ڕووگه‌ها هنده‌كان. وئه‌گه‌ر تو د مه‌سه‌لا ڕووگه‌هێ وتشتێن دى دا دويكه‌فتنا دلچوونێن وان بكه‌ى، پـشـتـى زانــيــن بـۆ تــه‌ هاتى كو تو يێ حه‌قى وئه‌و دنه‌حه‌قن ، هنگى تو دێ ژ وان بى يێن زۆردارى ل خۆ كرى. وئه‌ڤ گۆتنه‌ بۆ ئوممه‌تێ هه‌مییێیه‌، وئه‌و گه‌فه‌كه‌ بۆ وان یێن دژاتییا شریعه‌تى دكه‌ن.

الَّذِينَ آتَيْنَاهُمُ الْكِتَابَ يَعْرِفُونَهُ كَمَا يَعْرِفُونَ أَبْنَاءَهُمْ ۖ وَإِنَّ فَرِيقًا مِّنْهُمْ لَيَكْتُمُونَ الْحَقَّ وَهُمْ يَعْلَمُونَسورة البقرة - عدد الآيات 286 - الآية 146

(146) ئه‌وێن مه‌ ته‌ورات وئنجيل دايێ ژ زانايێن جوهى وفه‌لان دزانن كو موحه‌ممه‌د -سلاڤ لێ بن- پێغه‌مبه‌رێ خودێیه‌، ب وان سالۆخه‌تێن وى يێن د كيتابێن وان دا هاتين، هه‌ر وه‌كى ئه‌و كوڕێن خۆ ناس دكه‌ن. وهندى ده‌سته‌كه‌كه‌ ژ وان حه‌قییێ ڤه‌دشێرن، هه‌ر چه‌نده‌ ئه‌و دزانن كو ئه‌و يێ ڕاستگۆيه‌, وسالۆخه‌تێن وى دبنه‌جهن.

الْحَقُّ مِن رَّبِّكَ ۖ فَلَا تَكُونَنَّ مِنَ الْمُمْتَرِينَسورة البقرة - عدد الآيات 286 - الآية 147

(147) ئه‌ى پــێـغــه‌مـبــه‌ر، ئــه‌وا بــۆ تــه‌ هاتییه‌ خوارێ، حه‌قییه‌ ژ خودايێ ته‌يه‌، ڤێجا تو تێدا يێ ب گومان نه‌به‌. وئه‌ڤ گۆتنه‌ ئه‌گه‌ر چ بۆ پێغه‌مبه‌رییه‌ ژى به‌لێ ئه‌و بۆ ئوممه‌تێیه‌.

وَلِكُلٍّ وِجْهَةٌ هُوَ مُوَلِّيهَا ۖ فَاسْتَبِقُوا الْخَيْرَاتِ ۚ أَيْنَ مَا تَكُونُوا يَأْتِ بِكُمُ اللَّهُ جَمِيعًا ۚ إِنَّ اللَّهَ عَلَىٰ كُلِّ شَيْءٍ قَدِيرٌسورة البقرة - عدد الآيات 286 - الآية 148

(148) وبۆ هه‌ر ملله‌ته‌كى ڕووگه‌هه‌ك هه‌يه‌ ئه‌و د نڤێژا خۆ دا به‌رێ خۆ دده‌نێ، ڤێجا هوين گه‌لى خودان باوه‌ران له‌زێ د كرنا وان كارێن چاك دا بكه‌ن يێن دينێ ئيسلامێ پێ هاتى. وڕۆژا قيامه‌تێ، ل هه‌ر جهه‌كێ هوين لێ بن، خودێ هه‌وه‌ هه‌مییان دێ كۆم كه‌ت. هندى خودێیه‌ ل سه‌ر هه‌ر تشته‌كى يێ خودان شيانه‌.

وَمِنْ حَيْثُ خَرَجْتَ فَوَلِّ وَجْهَكَ شَطْرَ الْمَسْجِدِ الْحَرَامِ ۖ وَإِنَّهُ لَلْحَقُّ مِن رَّبِّكَ ۗ وَمَا اللَّهُ بِغَافِلٍ عَمَّا تَعْمَلُونَسورة البقرة - عدد الآيات 286 - الآية 149

(149) وهه‌چى جهێ تو -ئه‌ى پێغه‌مبه‌ر- ب ڕێڤنگى ده‌ركه‌فتیيێ وته‌ ڤيا نڤێژێ بكه‌ى، تو به‌رێ خۆ ب لايێ مزگه‌فتا حه‌رام ڤه‌ بده‌. وهـنـدى به‌رێخۆدانا ته‌يه‌ ب وى لایى ڤه‌ ئه‌وه‌ حه‌قییا بنه‌جهـ ژ نك خودايێ ته‌. وخودێ يێ بێ ئاگه‌هـ نينه‌ ژ كارێ هوين دكه‌ن، وئه‌و دێ هه‌وه‌ سه‌را وێ چه‌ندێ جزاده‌ت.

وَمِنْ حَيْثُ خَرَجْتَ فَوَلِّ وَجْهَكَ شَطْرَ الْمَسْجِدِ الْحَرَامِ ۚ وَحَيْثُ مَا كُنتُمْ فَوَلُّوا وُجُوهَكُمْ شَطْرَهُ لِئَلَّا يَكُونَ لِلنَّاسِ عَلَيْكُمْ حُجَّةٌ إِلَّا الَّذِينَ ظَلَمُوا مِنْهُمْ فَلَا تَخْشَوْهُمْ وَاخْشَوْنِي وَلِأُتِمَّ نِعْمَتِي عَلَيْكُمْ وَلَعَلَّكُمْ تَهْتَدُونَسورة البقرة - عدد الآيات 286 - الآية 150

(150) وهه‌چى جهێ تو -ئه‌ى پێغه‌مبه‌ر- ده‌ركه‌فتییێ تو به‌رێ خۆ ب لايێ مزگه‌فتا حه‌رام ڤه‌ بده‌، وهه‌چى جهێ هوين –گه‌لى موسلمانان- لێ بن ژ عه‌ردى ووه‌لاتان، هوین به‌رێ خۆ ب لايێ مزگه‌فتا حه‌رام ڤه‌ بده‌ن؛ دا پشتى ڤێ به‌رێخۆدانێ ئه‌و مرۆڤێن نه‌ د گه‌ل هه‌وه‌ چو هێجه‌تان ب هه‌ڤڕكى ڤه‌ ل سه‌ر هه‌وه‌ نه‌گرن, ئه‌و تێ نه‌بن يێن زۆردارى وڕكدارى كرى ژ وان، ئه‌و هه‌ر وهه‌ر ل سه‌ر هه‌ڤڕكییا خۆ دێ مينن, ڤێجا هوين ژ وان نه‌ترسن و ب جهئينانا گۆتن وفه‌رمانا من ژ من بترسن, ودا ئه‌ز قه‌نجییا خۆ ل سه‌ر هه‌وه‌ پێك بينم ب هلبژارتنا شريعه‌تێن پێكهاتيتر بۆ هه‌وه‌, ودا به‌لكى هوين بێنه‌ سه‌ر ڕێكا ڕاست ودورست.

كَمَا أَرْسَلْنَا فِيكُمْ رَسُولًا مِّنكُمْ يَتْلُو عَلَيْكُمْ آيَاتِنَا وَيُزَكِّيكُمْ وَيُعَلِّمُكُمُ الْكِتَابَ وَالْحِكْمَةَ وَيُعَلِّمُكُم مَّا لَمْ تَكُونُوا تَعْلَمُونَسورة البقرة - عدد الآيات 286 - الآية 151

(151) وكانێ چاوا مه‌ قه‌نجى ل هه‌وه‌ كر كو مه‌ به‌رێ هه‌وه‌ دا كه‌عبێ، وه‌سا مه‌ پێغه‌مبه‌ره‌ك ژ هه‌وه‌ ب خۆ د ناڤ هه‌وه‌ دا هنارت, ئه‌و وان ئايه‌تێن حه‌قییێ ونه‌حه‌قییێ ژێك جودا دكه‌ن ئه‌و بۆ هه‌وه‌ دخوينت, وهه‌وه‌ ژ پيسییا بوتپه‌رێسییێ وڕه‌وشتێن خراب پاقژ دكه‌ت، وكيتاب وسوننه‌تێ وئه‌حكامێن شريعه‌تى نيشا هه‌وه‌ دده‌ت, ويا هه‌وه‌ نه‌دزانى ژ به‌حسێ پێغه‌مبه‌ر وملله‌تێن بۆرى بۆ هه‌وه‌ دبێژت.

فَاذْكُرُونِي أَذْكُرْكُمْ وَاشْكُرُوا لِي وَلَا تَكْفُرُونِسورة البقرة - عدد الآيات 286 - الآية 152

(152) خودێ فه‌رمانێ ل خودان باوه‌ران دكه‌ت كو ئه‌و وى ل بیرا خۆ بیننه‌ڤه‌، وژڤان ب باشترین جزاریى دا وان، كو د ناڤ ده‌ســتـه‌كـا بلند دا ژ ملیاكه‌تان به‌حسێ وان یێن وى ل بیرا خۆ دئیننه‌ڤه‌ ب باشى بكه‌ت، وگۆت: گه‌لى خودان باوه‌ران، هوين ب گۆتن وكريار شوكرا من ب تنێ بكه‌ن, وقه‌نجییا من ل هه‌وه‌ كرى ژ بيرا خۆ نه‌به‌ن.

يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ ۚ إِنَّ اللَّهَ مَعَ الصَّابِرِينَسورة البقرة - عدد الآيات 286 - الآية 153

(153) گه‌‌لى خودان باوه‌ران، د هه‌مى كارێن خۆ دا هوين داخوازا هاريكارییێ ژ خودێ بكه‌ن: ب صه‌برا ل سه‌ر نه‌خۆشى وموصیبه‌تان, و ب صه‌برا ل سه‌ر هێلانا گونه‌هان, وخۆڕاگرتنا ل سه‌ر كرنا عيباده‌تى, و ب كرنا وێ نڤێژا دل پێ رحه‌ت دبت, یا كو مرۆڤى ژ كرێتییێ دده‌ته‌ پاش. هندى خودێیه‌‌ ب هاريكارییا خۆ يێ د گه‌ل بێنفره‌هان. وئه‌ڤ ئايه‌ته‌ هندێ دگه‌هينت كو خودێ ب هاريكارییێ تايبه‌ت د گه‌ل خودان بـاوه‌رانه‌, به‌لێ ئه‌و ب زانينا خۆ د گه‌ل هه‌مى مرۆڤانه‌.

وَلَا تَقُولُوا لِمَن يُقْتَلُ فِي سَبِيلِ اللَّهِ أَمْوَاتٌ ۚ بَلْ أَحْيَاءٌ وَلَٰكِن لَّا تَشْعُرُونَسورة البقرة - عدد الآيات 286 - الآية 154

(154) وهوين -گه‌لى خودان باوه‌ران- نه‌بێژنه‌ وان جيهادكه‌ران ئـه‌وێـن د ڕێـكـا خــودێ دا دئێنه‌ كوشتن: ئــه‌و دمرينه‌؛ به‌لكى ئه‌و د گۆڕێن خۆ دا دزێندينه‌ ب ژينه‌كا تايبه‌ت ب وان ڤه‌, ب تنێ خودێ دزانت كانێ ئه‌و ژیان یا چاوایه‌, به‌لێ هوين پێ ناحه‌سیێن. وئه‌ڤه‌ ده‌لیله‌ ل سه‌ر هه‌بوونا خۆشییێ د قه‌برى دا.

وَلَنَبْلُوَنَّكُم بِشَيْءٍ مِّنَ الْخَوْفِ وَالْجُوعِ وَنَقْصٍ مِّنَ الْأَمْوَالِ وَالْأَنفُسِ وَالثَّمَرَاتِ ۗ وَبَشِّرِ الصَّابِرِينَسورة البقرة - عدد الآيات 286 - الآية 155

(155) و ب هنده‌كێ ژ ترسێ, وبرسێ, وكێمكرنا مالى كو هوين ب زه‌حمه‌ت وى ب ده‌ست خۆ ڤه‌ بينن, يان هه‌ما هه‌مییێ ببه‌ين, وهه‌وه‌ ب مرنێ يان كوشتنا د ڕێكا خودێ دا, و ب كێمكرنا به‌رهه‌مێ دارقه‌سپ ومێو ودان ودكاكان، يان خرابكرنا وان, ئه‌م دێ هه‌وه‌ جه‌ربينين. وتو -ئه‌ى پێغه‌مبه‌ر- مزگينییێ ب وى تشتێ كه‌يف وخۆشییا دويماهییێ ل دنيايێ وئاخره‌تێ دگه‌هینت، بده‌ وان يـێن بێهن فره‌هییێ ل سه‌ر ڤێ چه‌ندێ دكه‌ن.

الَّذِينَ إِذَا أَصَابَتْهُم مُّصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَسورة البقرة - عدد الآيات 286 - الآية 156

(156) ژ سالۆخه‌تێن ڤان بێنفره‌هان ئه‌وه‌ ئه‌گه‌ر نه‌خۆشییه‌ك گه‌هشتێ‌ ئه‌و دبێژن: ئه‌م به‌نییێن خودێينه‌ وملكێ وينه‌, ئـه‌وه‌ مـه‌ ب ڕێڤه‌ دبه‌ت, ويا وى بڤێت ئه‌و د گه‌ل مه‌ دكه‌ت, وئه‌م ب مرنێ پاشى ڕابوونا بۆ جزادانێ دێ زڤڕينه‌ نك وى.

أُولَٰئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ ۖ وَأُولَٰئِكَ هُمُ الْمُهْتَدُونَسورة البقرة - عدد الآيات 286 - الآية 157

(157) ئه‌و بێنفره‌هێن هه‌ مه‌دح ودلۆڤانییه‌كا مه‌زن ژ خودێ بۆ وان هه‌يه‌، وئه‌و ئه‌ون يێن ل سه‌ر ڕێكا ڕاست.

  • Print
  • Twitter
  • Facebook
  • Google Bookmarks
  • email

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قورئانا پیروز

تَبَّتْ يَدَا أَبِي لَهَبٍ وَتَبَّ

ئايه‌تا ژماره‌ 1

ژ سوره‌تا المسد

لاپه‌رێ يوتيوبێ

لاپه‌رێ فێسبوكێ

Untitled Document

لاپه‌رێ تويته‌رێ

لاپه‌رێ ئنستگرامێ

images