ئەو جهێن شەیطان لێ ئامادە دبن

_ژ جابری ـ خودێ ژێ رازی بیت ـ گوت: من گوهـ ل پێغەمبەری بوو ـ سلاڤ لێ بن ـ د گوت: ( ئەگەر زەلامەڪ چوو د مالا خودا، و ناڤێ خودێ ئینا دەما دچیتە ژوور و دەما خارنێ دخوت، شەیتان دبێژیت: نە جهێ ڤەحەویانا هەوە ل ڤێرێ یە و نەژی خارنا هەوە، و ئەگەر ڪەسەك ب ژوور ڪەفت و ناڤێ خودێ نە ئینا هنگێ شەیتان د بێژیت: جهێ ڤەحەویانێ ب دەست هەوە ڪەفت، و ئەگەر ل دەمێ خارنێ ناڤێ خودێ نەئینا هنگێ شەیتان دبێژیت: جهێ ڤەحەویانێ ژی ب دەست هەوە ڪەفت و خارن ژی) رواه مسلم 
ڤێجا ئەڤە هندێ د گەهینیت کو هەچیێ بهێتە د مالا خوڤە و ناڤێ خودێ نە ئینیت (ئانڪو نە بێژیت: بسم الله)
هنگێ شەیتان جهێ خو د مالا وی دا دبینیت، و هەروەسا د گەل خارنێ ژی.

_ژ ئەبی هورەیرە ـ خودێ ژێ رازی بیت ـ ڪو پێغەمبەرێ خودێ ـ سلاڤ لێ بن ـ گوت: (مالێن خو نەڪەنە گورستان، هندی شەیتانە ژ وێ مالێ د رەڤیت یا ڪو سورەتا بەقەرە تێڤە دهێتە خاندن ) رواه مسلم 
هەر دیسان ئەڤە ژی هندێ دگەهینیت ڪو ئەوێ پشت بدەتە قورئانێ ب گشتی و سورەتا بەقەرە ب تایبەتی، هنگێ شەیتان جهێ خو ل مالا وی د بینیت.

_ژ ئەبی هورەیرە ـ خودێ ژێ رازی بت ـ گوت: (مەلائیڪەت ناچنە د وێ مالێ دا یا ڪو پەیڪەر و وێنە تێڤە بن ) رواه مسلم 
و هەر جهەڪێ مەلائیڪەت نەچنێ شەیتان جهێ خو لێ دبینن، و مەرەم ژ پەیڪەر و وێنان: یێن هەر تشتەڪێ خودان رح بیت وەڪی یێن مروڤ و گیانەوەران.

_ژ ئەبی طەلحە ـ خودێ ژێ رازی بیت ـ : ڪو پێغەمبەرێ خودێ ـ سلاڤ لێ بن ـ گوت: (مەلائیڪەت ناچنە د وێ مالێ دا یا ڪو صە و وێنە تێڤە بن) متفق علیە
ژبلی هندێ ڪو صە یێ نێچیرێ بیت یان بو زێرەڤانیێ، یێن دی هەر روژ هندی دوو قیراطا ژ ئەجرێ مروڤی ڪێم دڪەن وەڪی د فەرموودەڪێ دا هاتی، و هەر قیراطەك هندی چیایێ ئوحودێ یە.

_ژ عائیشایێ ـ خودێ ژێ رازی بت ـ گوت: پێغەمبەرێ خودێ ـ سلاڤ لێ بن ـ گوت: ( صەیێ رەش یێ ڪو چو ژ رەنگێ سپی د ناڤ دا نەبیت، ئەو شەیتانە).

_عائیشاییێ ـ خودێ ژێ رازی بت ـ گوت: من گوهـ ل پێغەمبەرێ خودێ بوو ـ سلاڤ لێ بن ـ د گوت: ( مەلائیڪەت ناچنە د وێ مالێ دا یا ڪو زەنگ ( موزیڪە) تێڤە بیت)
د فەرموودەڪا دی دا پێغەمبەر ـ سلاڤ لێ بن ـ یا گوتی ڪو زەنگ بلویلا شەیتانییە.
و دەلیل ل دور حەرامییا موزیڪێ گەلەڪن.

_ژ ڪورێ عومەری ـ خودێ ژ هەردوویان رازی بیت ـ ڪو پێغەمبەرێ خودێ ـ سلاڤ لێ بن ـ گوت: ( بلا هندەك ژ نڤێژێن هەوە (یێن سوننەت) د مالێن هەوە دابن، و مالێن خو نەڪەنە گورستان ) رواه البخاري 
و یا ئاشڪەرایە ڪو گورستان و جهێن خەرابە جهێن شەیتانانە، ڤێجا ئەڤە هندی د گەهینیت ڪو هەچیێ نڤێژا د مالا خودا نەڪەت یان هەما نڤێژا نەڪەت، شەیتان جهێ خو ل مالا وی دبینن.