به‌رێ ڕه‌ش د بيروباوه‌رێن ئيسلامێ دا
به‌رێ ڕه‌ش د بيروباوه‌رێن ئيسلامێ دا
براستى يا سه‌يره ده‌مێ هنده‌ك كه‌سێن نه‌زان هزردكه‌ن كو موسولمان عيباده‌تا به‌رێ ڕه‌ش ده‌كه‌ن! پتريا وان كه‌سێن ڤێ چه‌ندێ دبێژن كه‌سێن موشركن دڤێن ئيسلامێ ژى بهزرا خو بكه‌نه ئاينه‌كێ شركى! هه‌كه خو بدره‌و و بێ به‌ختيا ژى بيت، و يا سه‌يره گه‌له‌ك ژ موسولمانان ژى پێزانين لسه‌ر ڤى به‌رێ ڕه‌ش نينه.. له‌ورا ئه‌م دێ دڤى بابه‌تى دا گومانێن بێباوه‌را و موشركا كومكه‌ين و به‌رسڤا وانا ده‌ين دگه‌ل چه‌ند پێزانينه‌كا داكو موسولمان مفاى ژێ ببينن و دوژمنێن ئيسلامێ ژى بێده‌نگ ببن.
1- هنده‌ك كه‌س هزردكه‌ن ڤى به‌رى سيفه‌تێن خوداوه‌ندى يێت هه‌ين ! ئانكو لده‌ف وانا به‌ره‌كێ خارقه و ناشكێت و كه‌س نه‌شێت نێزيك ببت!
به‌رسڤ: نه‌خێر ، وه‌كى هه‌ر به‌ره‌كێ دى يێ سروشتى يه ، بتنێ ژێده‌رێ وێ ژ به‌حه‌شتێ يه وه‌كى مروڤا و گه‌له‌ك ماده و بونه‌وه‌رێن ديتر يێن كو ژێده‌رێ وان ژ به‌حه‌شتێ . پێغه‌مبه‌ر ﷺ دبێژيت: " الركن و المقام ياقوتتان من يواقيت الجنة " (صحيح الجامع 5872) .
هه‌روسا ئه‌ڤ به‌ره توشى ژناڤچون و ژكه‌ستن و گهورينێ دبيت .. چونكى بكورتى ..به‌ره!!
له‌ورا پێغه‌مبه‌ر ﷺ دبێژيت ده‌مێ به‌ر ژ به‌حه‌شێت هاتيه خار ژ شيرى سپيتر بو به‌لێ گونه‌هێن مروڤا بونه ئه‌گه‌رێ ڕه‌شبونا به‌رى. " نزل الحجر الأسود من الجنة وهو أشد بياضا من اللبن فسودته خطايا بني آدم " ( مشكاة المصابيح 2577)
كه‌عبه دوو جارا توشى سوتنێ بويه ! لجارا دوێ به‌رێ ڕه‌ش بويه سێ پرت له‌وما بزيڤى ئه‌و سێ پرته گه‌هاندنه ئێك ، لساڵا 363 كوچى كه‌سه‌كێ فه‌له هه‌ولا شكاندنێ دا به‌لێ موسولمانا نه‌هێلا ، و لساڵا 413 كوچى كه‌سه‌كێ شيعه چه‌ند پرته‌ك ژێڤه‌كرن ، هه‌روسا لساڵا 990 كوچى ديسان كه‌سه‌كى هه‌ولدا بشكينت به‌لێ موسولمانان نه‌هێلا و لساڵا 1351 كوچى كه‌سه‌كێ ئه‌فغانى پرته‌كا بچيك ژێڤه‌كر به‌لێ ژلايێ ده‌زگه‌هێن ئه‌منى ڤه هاته گرتن ، و عوسمانيان هنده‌ك ژڤان پرتا يێت داناينه دهنده‌ك مزگه‌فتێن خوڤه لتركى ... له‌ورا ژبه‌ر ڤێ چه‌ندێ پاشايێ سعوديێ ئه‌و پوشاكێ زيڤى بو ده‌وروبه‌رێ به‌رى چێكر داكو يێ پاراستى بيت. ( فضل الحجر الاسود – سائد بكداش )
هه‌روسا ئێك ژنيشانێن دوماهيا دونيايێ خراببونا كه‌عبێ يه وه‌كى پێغه‌مبه‌رى ﷺ گوتى : " كأني به أسود أفحج يقلعها حجرا حجرا " ( مشكاة المصابيح 2577)
ژبه‌ر ڤێ چه‌ندێ به‌رێ ڕه‌ش وه‌كى هه‌ر به‌ره‌كى توشى شكه‌ستن و ژناڤچونێ دبيت.
2- بوچى خودێ كه‌عبه نه پاراست و ديساڤه ته‌يرێن ئه‌بابيل فرێنه‌كرن؟
به‌رسڤ: هاتنا ته‌يرێن ئه‌بابيل گرێداى بو بريدانه‌كا دياركريڤه و خودێ د قورئانێ دا نه‌گوتيه چ كه‌سێ هێرش بكه‌ت دێ ته‌يرێن ئه‌بابيل هێنێ! له‌وا هاتنا ته‌يرێن ئه‌بابيل بتنێ گرێداى بو بوێ رويدانێ ڤه دا كو كه‌عبه يا پاراستى بت هه‌تا كو موحه‌مه‌د ﷺ دئێت ، ده‌مێ موحه‌مه‌د ﷺ هاتى لوى ده‌مى ئه‌و به‌ره ئيمانه‌تى ئه‌هلێ ئيسلامێ يه بپارزێن و بره‌نگه‌كێ گشتى دێ ئه‌ڤ به‌ره و كه‌عبه‌يه مينت هه‌تا كو لروژا دوماهيێ كه‌سه‌ك بته‌مامى خراب دكه‌ت.
3- بوچى موسولمان خو بو دچه‌مينن ؟ ئه‌رێ ئه‌و عيباده‌تا وى به‌رى دكه‌ن؟
به‌رسڤ: موسولمان خو بو به‌رى و كه‌عبێ نا چه‌نمينن ، خو بو خودێ دچه‌مينن لده‌مێ به‌رێ وان لكه‌عبێ و به‌رێ ره‌ش ، ئانكو بتنێ كه‌عبه و به‌رێ ڕه‌ش نيشان و قيبله يه بو جهه‌كێ دياركرى نه‌كو ژبه‌ر هه‌بونا كه‌عبێ و به‌رێ ڕه‌ش موسولمان سوجدێ دبه‌ن ، چونكى دهيچ ئايه‌ته‌كێ دا خودێ نه گوتيه سوجدێ بو ببه‌ن و پێغه‌مبه‌رى ژى ﷺ نه گوتيه سوجدێ بو ببه‌ن، بتنێ د قورئانا پيروز دا يا هاتى به‌رێ خو بده‌نه مزگه‌فتا الحرام ده‌مێ بو خودێ دچنه سوجدێ .
خودێ – جل جلاله – دبێژيت : " فَوَلِّ وَجْهَكَ شَطْرَ الْمَسْجِدِ الْحَرَامِ " (البقرة :١٤٤) ، ناڤێ مزگه‌فتێ دقورئانێ دا هات چونكى (مسجد) ئه‌و جهه‌يه يێ سوجده لێ دئێته برن بو خودێ و نه‌گوتيه بو به‌رى و كه‌عبێ هه‌رنه سوجدێ دا كه‌س هزرنه‌كه‌ت عيباده‌ت بو كه‌عبێ يه ، هه‌روسا (مسجد) جهه و مه‌رج نينه يێ ئاڤا بيت له‌وما ئێكه‌م قيبله‌يا موسولمانان كو بيت المقدس بو وى ده‌مى بيت المقدس نه هاتبو ئاڤاكرن ئانكو نه مزگه‌فت بو (المختصر في أخبار البشر ج1 ص38) .. و نوكه ژى ئه‌گه‌ر كه‌عبه و به‌رێ ڕه‌ش نه‌مان و هاتنه خرابكرن لوى ده‌مى دێ هه‌ر به‌رێ خو ده‌ينه (مسجد الحرام) چونكى ئه‌و جهه قيبله يه .
ئێك ژ رويدانێن كو ئه‌ڤ چه‌نده تێدا چێوبى .. لساڵا 317 كوچى پاشايێ به‌حرێنێ كه‌سه‌كێ قه‌رمه‌تى بو پشتى كو بسه‌ر مه‌كه‌هێ دا گرتى حه‌جى كوشتن و به‌رێ ڕه‌ش بوخو بر له‌وا 24 ساڵا ئه‌و به‌ره ما لبه‌حرێنێ وى دڤيا خه‌لك به‌حرێنێ بكه‌ته قيبله.. پشتى هينگى وان بخو زڤرانده ڤه چونكى موسولمانان قيبله‌يا خو نه‌گوهارت. ( تاريخ الطبري ج11 ص371)
لوى ده‌مى موسولمانا هه‌ر به‌رێ خو ددا ( مسجد الحرام ) و قيبله‌يا خو نه گوهارتن چونكى خودێ گوتيه به‌رێ خو بده‌نه وى جهى ..له‌وا ئه‌ڤ رويدانه مه‌زنترين به‌لگه‌يه كو موسولمان عيباده‌تا وى به‌رى و كه‌عبێ ناكه‌ن.
خودێ دبێژيت: " فَلْيَعْبُدُوا رَبَّ هَٰذَا الْبَيْتِ " (قريش :٣) ئانكو: عيباه‌تا خودێيێ ڤێ به‌يتێ بكه‌نن ، و نه‌گوتيه عيباده‌تا به‌رێ ڕه‌ش بكه‌ن!
له‌ورا كار و كريار بئنيه‌تا يه " انما الاعمال بالنيات " (متفق عليه ) و چ موسولمانان ئنيه‌ت نه‌كريه عيباده‌تا به‌رێ ره‌ش بكه‌ن و كه‌سى ژى ئه‌ڤ هزره نه‌كريه ده‌مێ به‌رێ خو دده‌ته قيبلێ و نڤێژێ دكه‌ت.
بو زانين خو لسه‌رده‌مێ كافرێن قوره‌يشى ژى لوى ده‌مێ كو سه‌نه‌م په‌رێسى لهه‌مى جها ، كه‌سى عيباده‌تا به‌رێ ڕه‌ش و كه‌عبێ نه دكر ! ديروكنڤيس محمد طاهر الكردي – رحمه الله – دبێژت : " ومما هو جدير بالذكر والألتفات إليه، أن العرب في جاهليتها مع عبادتهم الأحجار وبالاخص حجارة مكة والحرم ، لم يسمع عنهم أن أحدا عبد الحجر الأسود أو المقام ، مع عظيم أحترامهم لهما و محافظتهم عليهما " ( فضل الحجر الاسود – سائد بكداش ص53)
دگه‌ل ڤێ چه‌ندێ ژى دا ئه‌ڤى به‌رى بهايێ خو يێ هه‌ى لده‌ف مو موسولمانا كو ئێك ژ نيشانێن ئيسلامێ يه و حه‌ژێدكه‌ين چونكى پێغه‌مبه‌رى ﷺ ئه‌و به‌ره ماچ دكر ، له‌وا عومه‌رێ كورێ خه‌تابى دگوت : ئه‌ز دزانم تو به‌ره‌كى نه ته مفا هه‌يه و نه زيان به‌لێ چونكى من ديتيه پێغه‌مبه‌رى ﷺ تو ماچدكرى له‌وا ته ماچدكه‌م.
ئه‌ڤه‌نه بيروباوه‌رێن مه ده‌رباره‌ى به‌رێ ڕه‌ش ببه‌لگه‌يێن قورئان و سوننه‌تێ، له‌وا ئه‌گه‌ر هه‌ر نه‌زانه‌كێ حاقد گوت موسولمان عيباده‌تا به‌رى دكه‌ن!لوى ده‌مێ دێ بێژينى د كيش ئايه‌تێ دا خودێ گوتيه عيباده‌تا وێ بكه‌ن! هنگى دێ موفلسيا وى دياربت چونكى چونكى يا دياره وه‌كى ڕوژى ئيسلام بتنێ ئاينێ ته‌وحيدێ يه و ئه‌وا دڤێت بدره‌و و بێ به‌ختيان توهمه‌تا بو ئيسلامێ چێبكه‌ن.
------------ نڤيسين: -----------
📝 علي عبدالله هسنياني (
:::: 29 رمضان 1439 كوچى ::::
عربة الشراء