دێ چەوا خو ژ هەوایێ” خرابیا ”
نەفسا خو پارێزی
گومان تێدا نینە لدەڤ مە هەمیان كو نەفسا مە بەردەوام دڤێت مە بتشتەكی ڤە مژیل بكەت كو چ مفا بو قیامەتا مە نەبیت ،و هەر كەسەكێ  تو بینی د ناڤ گوناهان دا غەرقی  ئیلا دێ بینی كو بەردەوام ئەو یێ گوهداریا نەفسا خو دكەت ویێ بەرەڤ وان خوشیانڤە دچیت یێن كو نەفسا وی بەرێ وی ددەتێ .و طبیعەتێ نەفسێ ب خو یێ هوسایە  بو نمونە لسەر نەفسێ تشتەكی گەلەك عادیە كو تو خو ب سەعەتا بتشتەكێ بێ مفاڤە مژویل بكەی .بەلێ بتێ تو بیست  لاپەرێن قورئانێ بخینی ئەڤ چەندە دێ وەكی چیایەكێ یێ گران بیت لسەر نەفسێ .
ڤێجا دا كو خو ژ خرابیێت نەفسا خو ب پارێزین گەلەكا فەرە ئەم كاری ب ڤان خالان بكەین

ڤێجا داكو ژ داڤێن ئێخسیریا نەفسا خو رزگار بی بەردەوام ڤان خالا ل بیرا خو بینە 

ئێك :دڤێت تو باش بیرا خو بینی كو ئەو خوشییا ب رێكا تێركرنا شەهوەت و هەوایێ نەفسێ دگەهنە تە خوشییەكا بەروەختە ،و ئەگەر تو دگەل خوشییا ئاخرەتێ یا بەردەوام قیاس بكەی هەر چ حسێب بو وێ نائێتە كرن

دوو:ئەو خوشییا مروڤ پێ د حەسیێت دەمێ گوهداریا 
فەرمانا خودێ ل سەر حسێبا نە گوهدارییا هەوایێ نەفسێ دكەت، گەلەك ژ وێ خوشیێ مەزنترە یا ئەو پێ د حەسیێت دەمێ ئەو گوهدارییا هەوایێ نەفسێ دكەت

سێ: دەمێ تو ل بیرا خو د ئینی كو تو سەركەفتی ژ وێ هەڤركییێ دەردكەڤی یا نەفسا تە تو ئێخستییێ.تو دێ هەست ب خوشی و شرینییا سەركەفتنێ و ئیمانێ كەی

چار: دڤێت تو باش بزانی كو ئەڤ خوشییا سەركەفتنێ یا تو هەست پێ دكەی گەلەك ژ وێ خەم و شەرمزاریێ باشترە یا ب سەر تە دا د ئێت دەمێ تو گوهدارییا هەوایێ نەفسێ و شەهواتا دكەی و پێ ل ئەمرێ خودێ ددانی.
پێنج :لبیرا خو بینە كو خودێ تو بۆ طاعەتێ خو یێ دای نە كو دا تو سەربەردای بژی و بەس دلچوون و شەهواتێن خو تێر بكەی و پاشی تو هزرا خو د هندێ دا بكە كو ئارمانج ژ هەبونا خو ب جهئینی كەیفەكا مەزن دێ بوتە چێبیت.
شەش :دڤێت تو هزرا خو د هندێ دا بكەی كانێ گوهدارییا تە بو هەوایێ نفسێ و شەهواتا دێ چ مفای گەهینتە تە و بەرێ تە دێ دەتە كیڤە ،پاش تو وێ چەندێ دگەل وی ئەنجامی قیاس بكە یێ كو تو دێ گەهیێ ئەگەر هات تە ئەمرێ خودێ بجهئینا .هینگێ تو دێ زانی چەند جوداهییەكا مەزن دناڤبەرا هەر دوو حالەتان دا هەیە
حەفت:ل بیرا خو بینە ئەوێ گوهدارییا خودێ بكەت ودویكەفتنا  نەفسێ و شەیطانی نەكەت ،بهایێ وی لنك خودێ و لنك خەلكی ژی دێ مەزن بیت ،و ئەڤە بو تە ژ هندێ چێترە كو تو دەمەكێ كورت هەست ب خوشیێ بكەی پاش تام بكەیە خەمگینیێ،و بهایێ تە د چاڤێت خودێ  و یێت خەلكی ژی دا نەمینت 

هەشت :دڤێت تو ل بیرا خو بینی كو ئەوێ دویكەفتنا هەوایێ نەفسێ بكەت ئەو خو دكەتە عەبدێ نەفس و  شهوەتێن خو و مروڤێ عەقلدار قەبیل ناكەت ژ بلی خودێ عەبدینییا كەسێ دی بكەت.

نەهـ: دەمێ نەفسا تە بەرێ تە ددەتە خرابیێ و شهوەتا دڤێت تو ل بیرا خو بینی كو رێكا جەهنەمێ ب خوشیان یا هاتییە رەشاندن و توخیب دان وەكی پێغەمبەر سلاڤ لێ بن د حەدیسەكا خو دا د بێژیت :(حفت الجنة بامكارە و حفت النار بالشهوات)بەحشت ب نە خوشییان یا هاتیە پەرژانكرن،و ئاگرێ جەهنەمێ ب خوشییان یێ هاتییە پەرژانكرن.
دەهـ:  دڤێت تو بیرا خو بینی كو ئەوێ نەشێتە خو نەشێتە كەسێ دی ،و جیهادا دگەل نەفسێ بناخەیێ هەر جیهادەكا دی یە.
ئەڤ خالە یێت د پەرتوكا(روضة المحبین )دا هاتین نێزیكی 30خالا.یا زانایێ مەزن ابن القیم رحما خودێ لێبیت و ماموستا تحسینی ژی یێت كرینە ئەڤ دەهە یێت كرینە د پەرتوكا (لبەر سیبەرا خودێ دا)ڤێجا یێ بڤێت لێ ب زڤریت بلا سحكەتە ژێدەرێ عەرەبی ژبەر كو گەلەك پترن .و من بخو گەلەك گهورین و كێم و زێدەهی یێن تێدا كرین
ل دوماهیكێ دێ بێژم ئەگەر تو دڤێ ژیانێ دا نەشێ نەفسا خو راستەرێ و كونترول بكەی...بەس بێژە من تو چ خوشیێ ژ ڤێ ژیانێ د بینی!!
خودایێ مەزن مە ژ خرابیا نەفسێن مە ب پارێزیت و مە دلشاد و بەختەوەر بكەت ل هەردوو ژیانا.