ئەو ئەگەرێن ڕۆژیێ پویچ دکەن:

١- چوونا نڤینا ژنکێ ل ڕوژێ حەرامە، و یێ ڤێ چەندێ بکەت گرتنا ڕۆژییەکا دیتر و کەفارەتا ستویر دکەڤیتە سەر ئەو ژی: دێ بەندەکێ ئازا کەت، ئەگەر نە دیت دێ دوو ھەیڤان لسەر ئێک ڕۆژییان گریت، ئەگەر نە شییا دێ خوارنێ دەتە شێست ھەژاران.

٢- خوارن و ڤەخوارنا ژ قەستا، بەلێ ئەگەر ژ ژبیرکرن بیت ڕۆژییا وی پویچ نابیت.

٣- وەرگرتنا شرینقێن خوارندەر ئانکو یێن جھێ خوارنێ دگرن، و وەرگرتنا خوینێ بۆ نموونە ژ ئەگەرێ خوین بەربوونێ، ئەڤە ڕۆژیێ پویچ دکەن، بەلێ ئەگەر شرینقە نە یا خوارندەر بیت لڤێرێ زانا یێن لسەر بوچوونێت جێواز چووین، لەوما یا ژ ھەژیترە نە ھێتە دان ھەتا پشتی فتارێ، وەکی دەرکەفتن ژ جێوازییا فەتوایێ.

٤- ھاتنا خوارێ یا ئاڤا شەھوەتێ کو دبێژنێ-  المني-  ل دەمێ ھشیاربوونێ ژ ئەگەرێ دەستپەرێ یان چوونا نیڤا ژنێ یان ماچیکرنێ، ئەگەر ئەو ب ھەلبژارتنا خۆ بکەت، بەلێ ئەو ئاڤا دھێتە خوار ژ ئەگەرێ خەونەکێ کو دبێژنێ -ئیحتیلام-  ئەڤە ڕۆژییا وی نا ئێخیت، چونکی ئەڤە نە ژ ھەلبژارتنا وییە.

٥- دەرکەفتنا خوینا عادێ یان چلکان: ھەر دەمێ ئافرەتێ خوینا عادێ یان چلکان دیت ھینگێ ڕۆژییا وێ پویچ دبیت.

٦- دل ڕابوونا ژ قەستا: ئەڤە ژی بریتیە ژ دەرئێخستنا خوارنێ و ڤەخوارنێ ژ گەدەیی ب رێکا دەڤی، بەلێ ئەگەر بێ دەسترییا وی دەربکەڤیت ھینگێ ڕۆژییا وی ناھێتە شکاندن.

ز- لێڤەبوونا ژ ئیسلامێ خودێ مە و موسلمانان ژێ پارێزیت.

تێبینی :
١- مەرجە ھەتا ب وان تشتێن بەری نوکە مە دیار کرین ڕۆژی پێ دکەڤیت ئەو کەسەکێ پێ زانا بیت و ب ھەلبژارتنا خۆ بکەت، بەلێ ئەگەر یێ پێ نەزان بیت یان ژبیر کر یان زوری لێ ھاتە کرن، ھینگێ ڕۆژییا وی پویچ نابیت.

٢- ھەر تشتەکێ ھەبیت خۆ پاراستنا ژێ دشیاندا نەبیت، وەکی توزا ڕێکێ و خوینا دفنێ و زێدە خوین بەربوون و ئیحتیلام و ھاتنا دل ڕابوونا بێ دەستیرییا مرۆڤی و تشتێن ھوسا، ئەڤە ھینگێ ڕۆژیێ نا ئێخن.

٣- یا فەرە ڕۆژی بھێتە خۆارن ئەگەر پێتڤی کرە ھندی بۆ ڕزگاربوونا نەفسەکێ ژ تێچوونێ، وەکی ڕزگاربوونا یێ دئاڤێ دا د خەندقیت و ھوسا.

٤- ھەر کەسەکێ ڕۆژییا خۆ پویچ بکەت بتشتەکێ ژ یێن بەحس لێ ھاتینە کرن لسەر پێتڤییە ئەو ھندی وان ڕۆژێن خوارین بگریت، دگەل تەوبەکرنێ بۆ خودێ تەعالا و کرنا ئیستغفاران ژ وێ چەندێ.

ژێدەر ژ پەرتۆکا:
کورتییا ئاخڤتنێ لسەر ئەحکامێن ڕۆژیگرتنێ

ژ نڤێسینا شیخ:
عبدالله بن جار الله بن إبراهيم الجار الله

وەرگێران: بێکەس إسماعيل عمر

ژ بەرهەمێن: سایتێ مزگەفت