هندەک مفا بۆ ڕوژیگران د هەیڤا ڕەمەزانێ دا:

١- پێتڤییە لسەر ڕۆژیگری ئەو ڕۆژیێن ڕەمەزانێ بگریت ب ئیمان و بخێر بزانیت، نە ژبەر چ ئەگەرێن دیتر.

٢- دبیت مرۆڤێ ڕۆژیگر توشی برینەکێ یان خوین ھاتنا دفنێ بیت یان دلێ وی بێ دەستی ڕابیت یان پیچەکا ئاڤێ یان پانزینێ بچیتە گەورییا وی بێ ھەلبژارتنا وی، بلا بزانیت کو ب ئەڤان تشتا ھەمییان ڕۆژییا وی پویچ نابیت.

٣- یا دروستە بۆ مرۆڤێ ب جەنابەت ئەو ئینیەتا ڕۆژیگرتنێ بینیت پاش سەرێ خۆ بشوت پشتی ھەلاتنا ڕوژێ، ھەروەسا دروستە بۆ ژنکا کەڤتییە د عادێ و چلکان ژی دا ئەگەر بەری ھەلاتنا ڕوژێ پاقژ بیت.

٤- ئەگەر ئافرەتا د چلکان دا پاقژ بوو بەری تەمامبوونا چل ڕوژان دروستە ئەو دێ سەرێ خۆ شوت و دێ نڤێژێ کەت و ڕۆژیێ گریت.

٥- دروستە مرۆڤێ ڕۆژیگر سیواکی بکاربینیت ل دەستپێکا ڕوژێ و دوماھییا وێ، و ئەڤ کارە سوننەتە ددەرحەقا وی دا وەکی یێن بێ ڕۆژی.

٦- پێتڤییە لسەر مرۆڤێ ڕۆژیگر و ژبلی وی پاراستنێ لسەر ئەرکان بکەن، و تشتێن حەرام  بجھ بھێلن و پێگرییێ ب فەرمانان بکەن و خۆ دویر بێخن ژ تشتێ پاشڤە لێدانان ژێ ھاتییە کرن،  دا ژ کەسانێت پەسەند و سەرکەفتی بن.

٧- پێتڤییە دەمێت ڕەمەزانێ ب دەرفەت بھێنە وەرگرتن بکرنا کارێن باش ژ کرنا نڤێژێ و سەدەقێ و خواندنا قورئانێ و زکرێ خودێ  و دوعاکرنێ و ئیستغفار کێشانێ چونکی ئەو زەڤیا عیبادەتی یە بۆ پاقژکرنا دلی ژ ھەر خرابکاریەکێ.

٨- پێتڤییە لسەر ڕۆژیگری و ژبلی وی پاراستنێ لسەر ئەندامێت لەشێ خۆ بکەن ژ گونەھان بگرە ژ ئاخڤتنا حەرام و بەرێخودانا حەرام و گوھدانا حەرام و خوارن و ڤەخوارنا حەرام و خوارنا حەرامیێ و ڕێڤەچوونا بەرەڤ حەرامی، دا ڕۆژی یا پاقژ بیت و قەبیل بیت، و دا مرۆڤێ ڕۆژیگر بڤێ چەندێ ھەژی لێبورینا خودێ و ئازاکرنا ژ ئاگری بیت.

٩- بۆ وی نینە یێ شەریعەتی دەستیری دایێ ئەو ڕۆژیێ نە گریت ژبەر نەساخیەکێ یان وەغەرەکێ، ئەو ڕابیت پێش ئێکێ ڤە بگریت.

١٠- و ئەگەر ئێک وەغەرێ بکەت ب مەبەستا شکاندنا ڕۆژیێ ھینگێ لسەر وی حەرامە ئەو وەغەرێ بکەت و ڕۆژیێ بشکێنیت، و لسەر وی ئەرکە ئەو ڕۆژیێ بگریت.

١١- ئەگەر ئەو کەسێ ڕۆژی لسەر واجب ڤییا بخوت یان ڤەخوت ل ڕوژەکا ڕەمەزانێ ژ ئەگەرێ ژ بیرکرنێ یان نە زانینێ، ئەرکە لسەر کەسێ وی دبینیت وی ئاگەھدار بکەت و بیرا وی لێ بینیت، چونکی ئەڤە ژ دەرگەھێ ھاریکاریێ یە لسەر باشیێ و تەقوایێ.

١٢- ڕۆژییا وی پویچ نابیت یێ مێشەک فریتە د گەورییا وی دا یان چ توز و  دیکێلەک بیت بێ مەبەستا وی، چونکی خۆ پاراستنا ژ ڤێ چەندێ یا بزەحمەتە.

١٣- یێ تشتەکی بخۆت چونکی گومان لسەر دەرکەفتنا سپێدێ ھەبوو ڕۆژییا وی یا دروستە، چونکی بنیات مانا شەڤێ یە ھندی دەرکەڤتنا سپێدێ پشت ڕاست نەبیت، و یێ تشتەکی بخۆت چونکی گومان لسەر رۆژ ئاڤابوونێ ھەبوو، ڕۆژییا وی یا دروست نینە، چونکی بنیات مانا ڕۆژێ یە.

١٤- تشتەکێ ب خێرە ئەو مەردینییا ل ھەیڤا رەمەزانێ ب دانا سەدەقێ و خواندنا قورئانێ، وەکی چاڤلێکرن ب پێغەمبەرێ خودێ سەڵاوات و سلاڤێن خودێ لسەر بن، و ئەو ڤێ چەندێ ب خێر بدانیت.

١٥- ژ ئەگەرێن ژێبرنا گونەھان ل ھەیڤا ڕەمەزانێ ئەڤە نە: گرتنا ڕۆژییان و کرنا نڤێژێن شەڤێ، و ساخکرنا شەڤا قەدرێ کو دبێژنێ: -ليلة القدر-  ئەگەر ئەو ب ئیمان و بخێر بکەت، ھەروەسا خواندنا قورئانێ و زکرێ خودێ و دوعاکرن و کرنا ئیستغفاران و لێزڤرینا بەرەڤ خودێ تەعالا ڤە و فتارەکرنا ڕۆژیگران و دانا سەدەقێ.

١٦- باشترین سەدەقە ئەوە یا د ھەیڤا ڕەمەزانێ دا دھێتە دان.

١٧- ئەو ڕۆژیێن ھاتینە قەزاکرن ئەگەر لدویڤ ئێک بھێنە گرتن خێرە و باشترە، بەلێ نە ئەرکە ئانکو نە واجبە، ھەروەسا خێرە و باشە ئەو لەزێ لێ بکەت.

١٨- دروستە ئەو وان ڕۆژیێن وی خوارین ببتە د ڕوژێن کورت وسار دا پێش وان ڕۆژێن درێژڤە و بەروڤاژی.

١٩- گرتنا ڕۆژیێ بۆ وی یێ دەستیری بۆ ھاتییە دان ئەو بخوت باشترە ئەگەر لسەر نە بیتە زەحمەتکاری، ژبەر گوتنا خودێ دەمێ دبێژیت: { وَأَن تَصُومُوا۟ خَیۡرࣱ لَّكُمۡ } [سُورَةُ البَقَرَةِ: ١٨٤]

۲۰ـ هەروەسا ڕۆژیگرتن قوتابخانا روحێ یە بۆ پەروەردەکرنا نەفسێ وکەزاختن وخەملاندنا وێ، وفێرکرنا نەفسێ یە لسەر هەدار کێشانێ
 

ژێدەر ژ پەرتۆکا:
کورتییا ئاخڤتنێ لسەر ئەحکامێن ڕۆژیگرتنێ

ژ نڤێسینا شیخ:
عبدالله بن جار الله بن إبراهيم الجار الله

وەرگێران: بێکەس إسماعيل عمر

ژ بەرهەمێن: سایتێ مزگەفت