چەند شیرەتێن ئاڕاستەکری بۆ ڕوژیگران

برایێ منێ موسلمان :

١- ڕۆژیێ بگرە ب ئیمان و بۆ خودێ تەعالا دا گونەھێن تە یێن چوویی ژێبەت.

٢- ھشیاربە تۆ ڕۆژییەکێ ژ ڕەمەزانێ بخۆی بێ ئەگەر و ژ قەستا چونکی ئەڤە ژ گونەھێت ھەرە مەزنە.

٣- ڕابە شەڤێن ڕەمەزانێ بۆ کرنا تەراویحان و نڤێژێن شەڤێ، بتایبەتی شەڤا قەدرێ تۆ ڕابە و ب ئیمان و بۆ خودێ ساخ بکە دا گونەھێن تە یێن چوویی بھێنە ژێبرن.

٤- بلا خوارن و ڤەخوارن و جلکێ تە یێ حەلال بیت دا کارێن تە بھێنە قەبیل کرن، و بەرسڤا دوعایێن تە بھێنە دان، و ھشیاربە تۆ ڕۆژیێ لسەر حەلالی بگری و فتارێ لسەر حەرامی بکەی.

٥- لدەڤ تە بلا ھندەک ڕۆژیگر فتارێ بکەن دا تۆ ھندی خێر و پاداشتێ ڕۆژییا وان ب دەستڤە بینی.

٦- پاراستنێ لسەر ھەر پێنچ نڤێژان بکە ل دەمێن وێ و دگەل جەماعەتێ دا تۆ خێر و پاداشتێ وێ وەربگری و پێ بھێیە پاراستن.

٧- زێدە سەدەقێ بدە چونکی خێرترین سەدەقە ئەوە یا د ھەیڤا ڕەمەزانێ دا دھێتە دان.

٨- ھشیاربە تۆ دەمێ خۆ بەرزە بکەی نە ب کارێن خێرێ ڤە چونکی تۆ ژێ بەرپرسی، و دێ پرسیار لسەر ژ تە ھێتە کرن، و دێ ھێیە خەلاتدان یان سوزادان لسەر وی کاری دمینیت یێ تۆ تێدا دکەی.

٩- عومرێ بکە د ڕەمەزانێ دا، چونکی ئەو عومرەیا د ھەیڤا ڕەمەزانێ دا دھێتە کرن بەرانبەری خێرا حەجەکێ یە.

١٠- خۆ بھێز بێخە لسەر گرتنا ڕۆژیێن ڕوژێ ب خوارنا پاشیڤێ ل دوماھییا بەشێ شەڤێ، ھندی تۆ نە ترسی کو دێ ڕوژ دەرکەڤیت.

١١- لەزێ بکە دخوارنا فتارێ دا ھەر دەمێ ئاڤابوونا ڕوژێ بنەجھ بوو، دا بڤێ چەندێ تۆ حەژێکرنا خودێ ب دەستڤە بینی.

١٢- سەرێ خۆ بشو ژ جەنابەتێ بەری ھەلاتنا ڕوژێ دا تۆ  بشێ ھەر زیکا عیبادەتێ خودێ بکەی ب پاک و پاقژی.

١٣- ھەبوونا تە د ھەیڤا رەمەزانێ دا ب دەرفەت ببینە، و خۆ مژیل بکە بکرنا کارێن خێرێ ڤە، ژ یا تێدا ھاتییە خوار ئەو ژی خواندنا قورئانا پیروزە ب ھزرکرن، دا بۆ تە ببیتە دیدەڤان لدەڤ خودێ، و مەھدەر ل ڕوژا قیامەتێ.

١٤- ئەزمانێ خۆ بپارێزە ژ درەوێ و تەعنەدانێ و غیبەتێ و نەمیمەتێ چونکی ئەڤە ژ خێر و پاداشتێ ڕۆژیێ کێم دکەت.

١٥- ڕۆژی بلا تە ژ سنورێت تورەبوونێ دەرنەئێخیت ژبەر ئەگەرەکێ بێ بھا و چنە، ب بەھانەیا ئەز یێ ب ڕۆژیمە، بەلکی دڤێت ڕۆژی ئەگەر بیت بۆ ئارامی و تەناھییا نەفسا تە.

١٦- ھوسا ژ ڕۆژییا خۆ دەربکەڤە و تە ئەڤە بدەستڤە ئینا بیت: ترسا ژ خودێ تەعالا و ھەستپێکرنا چاڤدێرییا وی ل تنێ و ئاشکەراییێ، و سوپاسییا قەنجیێن وی، و خۆ ڕاگریی لسەر فەرمانێت وی بکرنا ھەمی فەرمانێت وی و خۆ دویر کرن ژ ھەمی پاشڤە لێدانێت وی.

١٧- زێدە زکرێ خودێ بکە و کرنا ئیستغفاران و داخوازکرنا بەھشتێ و ڕزگاربوونا ژ ئاگری د ھەیڤا ڕەمەزانێ دا و ژبلی ڕەمەزانێ ژی، بتایبەتی تۆ یێ ب ڕۆژیی و لدەمێن فتارێ و پاشیڤێ دوعا قەبیل دبن، و ئەڤە ژ گرنگترین ئەگەرێن لێخوش بونێ نە.

١٨- زێدە دوعا بۆ خۆ و دەیباب و زاڕوک و موسلمانان ھەمییا بکە، و خودێ فەرمان یا ب کرنا دوعایان کری و بەرسڤدانا وێ یا کەفالەتی خۆ کری.

١٩- تەوبە بکە بۆ بەرەڤ خودێ تەعالا تەوبەکا دروست و یا ژ دل بکە ل ھەر دەمەکێ تۆ تێدا ئەو ژی: ب ھێلانا گونەھێ و پەشیمانی لسەر وێ گونەھێ و دلێ خۆ موکم بکەت کو ئەو جارەکا دی لێ نازڤریت، و خودێ تەوبا تەوبەداری قەبیل دکەت.

٢٠- شەشکێن ھەیڤا شەوالێ بگرە، چونکی یێ ڕەمەزانێ ھەمیێ بگریت پاش شەش ڕوژان ژ شەوالێ ھەر وەکی وی ڕۆژیێن سالێ ھەمیێ گرتن. (1)

٢١- ڕۆژییا ڕوژا نەھێ بگرە ژ ھەیڤا -ذي الحِجَّة-  کو دبیتە ڕوژا عەرەفێ و ژێبرنا گونەھێن سالا چوویی و یا بھێت ب دەستڤە بینە.

٢٢- ڕۆژییا ڕوژا دەھێ بگرە ژ ھەیڤا -الْمُحَرَّم-  دگەل نەھێ و ژێبرنا گونەھێن سالەکێ ب دەستڤە بینە. (2)

٢٣-ھەر یێ بەردەوام بە لسەر ئیمانێ و تەقوایێ و کارێن باش پشتی ڕەمەزانێ ژی ھەتا مرنێ، ھەر وەکی خودێ تەعالا دبێژیت: { وَٱعۡبُدۡ رَبَّكَ حَتَّىٰ یَأۡتِیَكَ ٱلۡیَقِینُ } [سُورَةُ الحِجۡرِ: ٩٩]

٢٤-و بلا شینوارێن عیبادەتی لتە دیار بکەن ژ کرنا تە بۆ نڤێژێ و گرتنا ڕۆژییان و زەکاتێ و چوونا حەجێ؛ ب تەوبەیەکا دروست و ژ دل، و ھێلانا نەریتێن بەروڤاژی شەریعەتی.

٢٥- زێدە سەڵاواتان بدە لسەر پێغەمبەرێ خودێ سەڵاوات و سلاڤێن خودێ لسەر وی و لسەر بنەمال و ھەڤال و دویڤکەتیێن وی بن ھەتا ڕوژا قیامەتێ.

یا خودێ تۆ مە و ھەمی موسلمانان بکە ژ وان یێن ڕۆژیێن ڕەمەزانێ گرتین و شەڤێن وێ بکرنا نڤێژان ساخ کرین ب ئیمان و بۆ تە کربن، ڤێجا بڤێ چەندێ تە گونەھێت مە یێن پێشییێ و پاشییێ ھەمی ژێبربن،  یا خودێ مە بکە ژ وان یێن ھەیڤا ڕەمەزانێ ھەمی گرتین و خێر و پاداشتێ وان ھەمی ھاتبیتە نڤیسین، گەھشتبیتە شەڤا ب قەدر و بھا گران، و ب خەلاتێ خودێ تەعالا سەرکەفتیبین،

خودایێ من [یا اللە] تو خودانێ لێبورینا مشەیی، و تو حەش دیارکرنا ئەڤی سالوخەتێ خۆ یێ پاقژ و تەمام دکەی، ڤێچا تو لمە خوش ببە و ببورە.

(2) لحديث أبي قوادة رواه مسلم. ھەر بۆ زانین مەڕەم پێ ژێبرنا گونەھێن بچویکن، و خۆ ژ گونەھێن مەزن دویر بێخیت.

ژێدەر ژ پەرتۆکا:
کورتییا ئاخڤتنێ لسەر ئەحکامێن ڕۆژیگرتنێ

ژ نڤێسینا شیخ:
عبدالله بن جار الله بن إبراهيم الجار الله

وەرگێران: بێکەس إسماعيل عمر

ژ بەرهەمێن: سایتێ مزگەفت