دەربارەیی زەکاتا سەرفتران

١- ئەو جورەکێ زەکاتێ یە دھێتە دان پێش ھەر لەش و نەفسەکێ ڤە، ژبەر گرتنا شکاندنا ڕۆژیێن ھەیڤا ڕەمەزانێ و دوماھیک ئینانا وێ.

٢- ئەرکە لسەر ھەر موسلمانەکی ئەو بکەت و یا وان کەسێن خودانکرنا وان ل ستویێ وی.

٣- ڕێژەیا وێ دبیتە ئێک -صاع-  ژ قویتێ ئەو باژێرە ژێ دخون ئەگەر ھند ھەبیت ژ قویتێ پێتڤییا وی و خێزانا وی ژ ڕوژ و شەڤا جەژنێ زێدەتر بیت.

٤- ھندیکە -صاع-  ە ڕێژەیا وێ دبیتە چوار مست ژ مستێن پێغەمبەری سەڵاوات و سلاڤێن خودێ لسەر بن، و مست تژیکرنا دەستێن ناڤنجینە کو ب کیلویان ب نێزیکی دبیتە دوو کیلو و نیڤ.

٥- ئەگەر نە بوو بتنێ ھند ژ ساعەکێ ھەما ئەو وێ ھندێ دەرئێخیت، ژبەر گوتنا خودێ تەعالا: { فَٱتَّقُوا۟ ٱللَّهَ مَا ٱسۡتَطَعۡتُمۡ  } [سُورَةُ التَّغَابُنِ: ١٦]

٦- وی جۆرێ قویتی دەربێخە یێ ژ ھەمییا باشتر بۆ بەرژەوەندییا ھەژاری.

٧- و خێرە ئەگەر ئەڤ جۆرێ زەکاتێ پێش زاروکێ د زکێ ئافرەتێ دا بھێتە دان بەلێ نە ئەرکە ئانکو نە واجبە.

٨- و دەمێ دەرئێخستنا زەکاتا فتران ڕوژا جەژنێ یە بەری نڤێژێ، و دروستە ب ڕوژەکێ یان دوویان بەری ھینگێ بھێتە دەرئێخستن، و نابیت بھێتە گیروکرن ھەتا پشتی نڤێژا جەژنێ، ژبلی ئەگەر ھێجەتەکا شەرعی ھەبیت دێ پشتی ھینگێ دەت.

٩- جھێ دەرئێخستنا وێ ھەر ئەو باژێرە یێ مرۆڤ لێ ئاکنجی لدەمێ مرۆڤ زەکاتێ دەرئێخیت.

١٠- و نابیت پێش قویتی ڤە پارە بھێنە دان، چونکی ئەڤە بەروڤاژی سوننەتێ یە، بەس ئەگەر چ خوارن نەبیت بدەت یان کەس نە دیت ژێ وەربگریت، ھینگێ دروستە ئەو پێش وی قویتی ڤە ب ڕێژەیا ساعەکێ پارەیی دەربێخیت پێش ھەر ئەندامەکێ خێزانێ ڤە.

١١- و دانا وێ دبیتە ئەرک ئانکو دبیتە واجب ب ئاڤا بوونا ڕوژێ ژ شەڤا جەژنێ، ڤێجا یێ پشتی ھینگێ موسلمان بیت یان ھەڤژینەکێ بۆ خو بینیت یان زاروکێ وێ بھێتە سەر دونیایێ، لسەر وی ئەرک نینە ئەو زەکاتا وان بدەت، بەلێ ئەگەر ئەڤ تشتە بۆ چێبوون بەری ھینگێ لسەر وی ئەرکە ئەو زەکاتا فترێن وان بدەت.

١٢- و دروستە کومەکا مرۆڤان زەکاتا خۆ بدەنە ئێک مرۆڤی یان ئێک زەکاتا خۆ بکەتە پارچە بۆ کومەکا مرۆڤان.

١٣- و ئەو کەسێن بۆ دھێنە خەرچکرن ھەر ئەو خەلکێ زەکاتێ نە یێن خودێ بەحسێ وان کرین، بەلێ لڤێرێ  ھێژاترە بدەنە کەسانێت ھەژار و کێم حال و دەیندار.

١٤- و ئەرکە ئەو زەکاتە بگەھیتە دەستێ کەسێ ژ ھەژی یان وەکیلێ وی لدەمێ وێ یێ دروست دا.

١٥- و مەرەم ژ ڤێ زەکاتێ ئەوە پاقژکرنە بۆ مرۆڤێ ڕۆژیگر ژ ئاخڤتنا نە دروست و کرێت، و پاریەکێ خوارنێ یە بۆ مرۆڤێن ھەژار، و بێ منەتییەکە بۆ وان کۆ ل ڕوژێن جەژنێ ئەو دەستێ خۆ لبەر چ کەسان درێژ نەکەن، و سوپاسییا خودێ یە کو سەرکەفتن دایی بۆ گرتنا ئەڤان ڕۆژییان.

ژێدەر ژ پەرتۆکا:
کورتییا ئاخڤتنێ لسەر ئەحکامێن ڕۆژیگرتنێ

ژ نڤێسینا شیخ:
عبدالله بن جار الله بن إبراهيم الجار الله

وەرگێران: بێکەس إسماعيل عمر

ژ بەرهەمێن: سایتێ مزگەفت