شیرەتەک بۆ برایێن خوشتڤی-أسأل الله القبول والنفع
شیرەتەک بۆ برایێن خوشتڤی
بێگومان دیارکرنا راستیێ، و بانگەوازیکرنا دینێ دروست، و بێ ستارەکرنا باتلی، و ئاگەھدارکرنا خەلکی ژ ڕێکێن بەرزە، و تاری و سەردەچوونێ بیبلکا چاڤێ ھەر بانگەوازەکێ دلسوز و ڕاستگو و خەمخورە و غیرەت لسەر دینێ خۆ ھەبیت، و لسەر وێ ڕێباز وڕێکا پێغەمبەریﷺ ھەڤالێت خۆ لسەر ھێلاتی.
بەلێ مخابن، ئەڤرو یا دل پێ دئێشیت، و دوژمنێت ئیسلامێ کەیف پێ دھێت ژ گاور، و منافق، و علمانی، و بیدعەچیا ئەوە؛ "ئەھلێ سوننەتێ و جماعەتێ" بکەڤنە داڤێن وان و پیلانێت کەسانێت خرابکار،
ڤێجا ئەو دژایەتیا ئێکو دوو بکەن، و سەرەدەریا ئەھلێ بیدعێ و سەردەچونێ دگەل ئێکو دوو بکەن، و دلوڤانیێ بئێکو دوو نەبن، و بەرژەوەندیا مەزن ژبیر بکەن کو پاراستنا دینییە، ڤێجا ئەو بشێوەکێ نە دروست رەخنێ ل ئێکو دوو بگرن و شاشیێ و نەخوشیێ بگەھینە موسلمانا.
بێگومان بەرسڤدان و رەخنەگرتن تشتەکێ ڕاستە، و یێ پێتڤییە و شیرەتکرن دروشمێ مروڤێ موسلمانییە، و دیارکرنا راستیێ، و بێ ستارەکرنا باتلی وئەھلێ وێ، ئەڤە ئەرکە لسەر ملێ ھەر کەسەکێ شیان لسەر دیارکرنا ڤێ چەندێ ھەبیت،
و ئەڤە ژ شیرەتێ یە، و دل پێڤەمانە بۆ ئوممەتێ، و بێگومان ئەو کارەکێ پیروزە، و دبیتە جیھاد وەکی شیخ الإسلام رحمه الله دبێژیت. بەلێ دڤێت دەستپێکێ بھێتە زانین:
ئەرێ ئەو خەلەتییە دبیتە ئەگەرێ ھندێ ئەو کەسە ژ بازنەیا ئەھلێ سوننەتێ دەربکەڤیت، ودژاتییا وی بھێتە کرن؟
ئەرێ ئەو کارە یان گوتنە بدروستی لسەر ھاتییە سەلماندن، ب بەلگەیێن ڤەبریی ھەتا ئەز تشتەکێ لسەر بەلاڤە بکەم یان بتنێ گومانن؟
ڕاستی وەکی پێتڤی بۆ ھاتییە دیارکرن ؟
دێ فتنەکا مەزنتر جھێ وێ گریت یان نە؟
ئەڤە دبەرژەوەندیا ئیسلام و موسلمانا دایە؟
ڤێجا ھەتا دوماھیێ ژ ڤان پرسیاران دڤێت بھێنە کرن، پاشی یا پێتڤی بھێتە کرن. پتریا جاران دەمێ دوو زانایێن بەرکەتی یان چەند قوتابیێن زانستێ شەرعی خیلاڤەکێ ڤە مژیل دبن،
دێ بینی کەسانێت نەزان، و مایتکەر، و خودان دیتنەکا کێم دێ ب ئەزمانەکێ نەخوش وی بابەتی ئازرینیت، و دێ کەتە پوست، و دێ گوتنێت کرێت، و یێن بێ ھەتك لسەر بەلاڤە کەت،
و دێ پشتەڤانییەکا کورە دەتە کەسەکی یان بوچونەکا ئیجتھادی و دێ بەلاڤ کەت، و دێ دەمارگێریێ و ڕکویێ لسەر گریت، و دێ بینی ڤێجا بۆ ئاگرەکێ نە ھێتە ڤەمراندن، ولا حول ولا قوة إلا بالله العلي العظيم.
تایبەتی ھوین ئەی ئەھلێ سوننەتێ دلۆڤانیێ ب ئێکو دوو ببەن، چونکی ھوین کێمترینێت مرۆڤانە، و دوژمنێت ھەوە گەلەکن، و پشتەڤانێت ھەوە کێمن، بلا رەخنەگرتنا ھەوە لسەر بنەمایێ شیرەتێ و دلسوزیێ و ڕاستگویێ بیت و فقكم الله و بارك فيكم.
ھەر وەکی الحسن رحمه الله گوتییە: "يا أهل السنة ترفقوا رحمكم الله فإنكم من أقل الناس " اللالكائي : 1/57/19 .
و چارەسەرییا ڤێ چەندێ دێ ئەڤە بیت:
سنورێ رەخنێ نە بەزینە کەساتییێ.
دەستپێکێ ئەم نیازێت خۆ پاقژ بکەین.
ئەم ھێجەتێن دروست بۆ ئێکو دوو بدانین.
لبن شیرەتێن زانایێن مەزن رەفتارێ بکەین.
بەرژەوەندیێن مەزنێت ئیسلامێ پێش بێخن.
لسەر ڕێباز و تێگەھشتن و ڕەوشتێ پێشیێن باش سەرەدەریێ لسەر بابەتێن ئالوز و فتنێ و نەخوشیێ بکەین.
ل وی دەمی دێ خودێ تیفاقێ و بارانەکا دلۆڤانیێ و ھینکاتیێ لسەر دلێت مە بارینیت، و دێ ڤی ئاگری ڤەمرینیت، و مە ژڤێ فیتنێ پارێزیت، إنه على كل شيء قدير، وهو تعالی أرحم الراحمين.
عربة الشراء