کورتیەك ژ جوانیێت ئیسلامێ "بەرێخودانەکا مەنهەجی"
نڤێسین: احمد بن یوسف السید
وەرگێران: شیڤان شێخەمیری
بسم الله، الحمدلله، والصلاة والسلام علی رسول الله وعلی آلە وصحبە ومن والاه، وبعد :
هەر تشتەکێ مروڤ داخاز دکەت ، دڤێت مفایێت وێ بزانی دا گرانیا وێ لسەر تە سڤک ببیت، چنکی هەر کەسێ بچیتە رێکەکا ب زەحمەت و گران ، ئەو پێدڤی هندێ یە کۆ مفایێن دیڤچونا ڤێ رێکێ بزانت دا بشێت خو ل بەر وەستیان و گرانیا وێ بگریت.
وئەم ئەڤرو یێت دناڤ گێلەشوکا هزروبیر و کلتور وئایینێت جێوازدا دژین ، ژبەر هندێ گەلەکا پێدڤییە ئەم چەندەکێ ژ جوانیێت ئیسلامێ بزانین.
ئێك: ژ جوانیێت ئیسلامێ ئەوە بەرێخودانا وێ یا گشتگیر بو مروڤی وگەردوونی و هەبوونێ.
تو د جوانی و تازەهی و مەزنیا ڤی دینی ناگەهی هەتا تو نەگەهییە بەرێخودانا وێ یا گشتی بو گەردوون و هەبوونێ ، ودونیا وئاخرەتێ ، وکا چ بو مروڤی هەیە پشتی هەبوونا وی لسەر ڤی عەردی ، دەمێ خودایێ مەزن عیباداتا ب هەمی جورانڤە لسەر مروڤی فەرز دکەت ، نە ژبەر هندێ یە دا ببنە هندەک ئەرک و ئەو جێبەجێ بکەت وخڵاس ، بەلێ هندەک مەرەم وئارمانج ومفایێن مەزن تێدا هەنە کۆ مروڤی ب خودێ بلند ڤە گرێددەن ، وەک گۆتنا خودایێ بلند: (واقم الصلاة لذکري) ئانکو: دا تو من د ڤێ نڤێژێدا لبیرا خۆ بینی.
ڤێجا ئیسلام رێکخستنا ژیانا مروڤا هەمیا بخۆڤە گرتیە ، نەکۆ هندەک گرتیە و هندەک هێلایە. 

دوو: تێگەهشتنا ڕاستیا پەرستنێ د ئیسلامێدا:
تو نەشێی ب تمامی ل جوانیا ئیسلامێ بگەهی هەتا تو ب تمامی راستیا پەرستنێ دئیسلامێدا نەزانی ، ودێ گەهیە ڤێ چەندێ ئەگەر کۆیر هزرا خۆ د وان ئایەت و حەدیسێن دڤی دەربارەیدا هاتین بکەی، یان ژی بەرێخو بدەیە گۆتنێت زانایێت ئیسلامێ یێن کۆ ئەڤ بوارە دیار وبەرچاڤ راگرتین لبن روناهیا دەقێن وەحیێ ژ قورئان و سوننەتێ ، پەرستن دئیسلامێدا نە هندەک لڤین و درویشم وئاخڤتنن بێ شکەستنا دلی و وحەژێکرنا وی بو پەرستی(معبود) یان ژی بێژن بەس ترس ورەڤ وبزدیانە بێ حەژێکرن و ڤیان وهیڤی.
بەلکۆ پەرستنێ دئیسلامێدا جوانیەکا مەزن یا هەی کۆ مروڤی حێبەتی و مەندەهوش دکەت.

سێ: جوانیێت ئیسلامێ د بەلگەئینانێدا:
ژ گرنگترین وان تشتێن مروڤ تێدا دراوەستت وهزرێن خو تێدا دکەت د ئیسلامێدا ژ جوانی و هێزو وتازەهی وجێوازیێ ئەوە بەلگەئینانا وێ یا جێگیر بو راست و درستیا وێ وهەڤبەرکرن دگەل هەمی ئایین و هزرو ئایدولوجیایێن دیتر.
ئیسلامێ بو راستی و درستی و مۆکمیا هەمی ئوصول و بنەمایێن خو بەلگەیێن ب هێز و هەڤڕەنگ و دیار و ئاشکرا هەنە ، وئەڤەیە یا کۆ تو ل چ ئایین و رێک و رێبازێن دیتردا نابینی.
بو نموونە: بەلگە ئینان بو جێگیر بوونا قورئانێ زانایێن موسلمانا هند بەلگەیێن هەین کۆ ناهێنە کومکرن وهژمارتن.

وئەڤە ژ بەرچاڤترین جوانیێت ئیسلامێ یە کۆ پێ درستیا خۆ جێگیر بکەت.

چار: زەلالیا عەقیدا ئیسلامێ د چێکەریدا(الخالق)
نینە د کەلتۆرێ ئومەتەکێ ژ ئۆمەتێن دیندار تەعظیم کرن ومەزن دانانا خودێ وپاقژ راگرتنا وی ژ کێماسیا هەبت وەک دئیسلامێدا هەی ژ قورئان و سوننەتێ ، وبڤێ چەندێ ئیسلام یا جێواز و جودایە ژ هەمی ئایین و ئایدولوجیایێن دیتر ، کو هەما دەستپێکا قورئانێ سورەتا فاتیحێ یە وبەحسێ مەزنی وملکێ وی سالوخەتێن وی دکەت ، وهەروەسا ئایەتا کورسی ، وسورەتا ئیخلاس ، و بشێوەکێ گشتی تو چ زەحمەتیێ نابینی د قورئانێدا بو بەلگە ئینانا لسەر ڤێ چەندێ ، وهەڤدژ دگەل جوهی و فەلا کۆ چەند بێرێزیێ دگەل خودێ دکەن وەک دبێژن خودێ و یعقوب بشەرکەفتن و یعقوبی شیایێ ، و عیسا خودێ یە ویێ هاتیە خاچدان.. هتد ژ خوزەعبەلاتێن وان.

پێنج: هەبوونا نموونێن کرداری یێن جێبەجێ دبن لسەر راستیێن تیوری
ژ جوانیێت دینێ ئیسلامێ ئەڤە کۆ دینەکە یێ ب زانین و جێبەجێێکرنا وێ هاتی ، وکا چاوا وەسیەت کریە ب ئەخلاقی و شەریعەت فەرز کریە ، ئها هوسا نمونەک ژی بومە فرێکریە کۆ ڤان کارا جێبەجێ بکەت و پێگیریێ پێ بکەت، ئەوژی ژیان ناما پێغەمبەریە سلاڤێن خودێ لێبن کو ب باشترین شێوە ئایین جێبەجێ کریە و هەر ئەو وەکی مە مروڤ بویە دا چ هێجەت بومە نەمینن و بێژین مانێ مەخلوقەکێ دیە و مە شیانێت وی نینن.
وچ سیرەت و گۆتن وکریار نەهاتینە پاراستن وەک یێن پێغەمبەری سلاڤێن خودێ لێبن.

شەش: هەڤبەرکرنا ئیسلامێ ب جاهلیەتێ
ژوان خالێن گرنگ یێن کۆ جوانیا ئیسلامێ پێ دیار دبت ئەوە ئەم بەرێخو بدەینە حال و کاودانێت جاهلیەتێ ، وبەرێخودانا لایەنێ چاکسازیا مەزن یا کو  پێغەمبەر پێ هاتی سلاڤێن خودێ لێبن ،بەرامبەر وێ چەندا بەربەلاڤ د نەفسا عەرەباندا ژ لایەنێ بیروباوەراڤە وسلوک و داب و نەریتێن وانڤە،

دێ بینی ئیسلامێ گهورینەکا مەزن پەیداکر شیا دماوێ کێمتر ژ چارێک چەرخیدا ل نیڤا دونیایێ بەلاڤ بت ،وئەو وەلاتە هەمی کرنە ئێک وەلات، ویاسایێن وان کرنە ئێک ، وژ خوداوەندێن وان بتنێ ئێک خودێ ما ،کاریگەری کر لسەر هزرو وبیر وزمان وکەلتورێ وان.
وئەڤ پاشکەفتنا نوکە ئەم تێدا دژین نە ژبەر پێگیرکرنا ب رێنمایێن ئیسلامێ یە ، بەلکۆ ژبەر دویرکەفتنا مەیە ژڤان رێنمایا چنکی چ تشت دئیسلامێدا نینە هەڤدژ بت دگەل پێشڤەچوونا زانستی.

حەفت: نویبوونا هەڤسەنگ
هەڤسەنگی و ناڤنجیاتی ل نک هەلگرێن هزرێن نویخازی یێن کۆ ئەوێن ژبەری خو ژناڤ دبەن کارەکێ گەلەکێ بزەحمەتە، بەلێ بەرێخۆ بدە ئیسلامێ دەمێ بنەما ورەهوریشالێن جاهلیەتێ هەلکێشاین وشوینا وێ سیستەمەکێ تەشریعی و بیروباوەرێن ڤەگرێن تمام ئینای ، دێ بینی گرنگیەکا مەزن دایە ب هەڤسەنگی وناڤنجیاتیا دیڤچووێن خو، ویێن ژزێدەگاڤیێ دویرئێخستین ، بەلکۆ هەرەشە یێ ل وان کەسان کرین یێن دژاتی و سەرپێچیا روحا هەڤسەنگیێ بکەت "ایاکم والغلو" وپتر رون دبت ب هەلۆیستێ وان هەرسێ کەسێن هاتین وپرسیارا پەرستنا پێغەمبەری کرین سلاڤێن خودێ لێبن، وکا چاوا بەرسڤا وان هاتیە دان.

هەشت: جوانیێت ئیسلامێ د وان دەرگەهێن گۆمانباز تێدا دهێنە ژوور
هەکه ئەم بەرێخۆ بدەینێ دێ بینین کۆ ئەو گۆمانێت دژی شەریعەتێ ئیسلامێ بکاردئینن پتریا وان سێ بابەتن ئەوژی بابەتێ جیهادێ وژنێ و تخویبایە"حدود" وهەکە باشتر بەرێخو بدەینە ڤان ئەحکاما وهزرێن خو تێدا بکەین دێ حیکمەت و جانی وباشیێ تێدا بینین وشانازیێ پێ بەین نەکۆ ب ڤەشێرین و وشەرم ژێ بکەین،
وەک سەرەدەریا ئیسلامێ د جەنگ و ئاشتیێ ودشەر و ئێمناهیێدا ، وهەروەسا رێزگرتنا ئافرەتێ ، ومۆکمییا حدود و تخویبێن ئیسلامێ، بەلێ بەرێخودانا وان بومە بەرێخودانەکا ستەمکارانە و دوژمنانەیە، یان هەکە ب عەدالەت بەرێخو دابانێ دا بینن کو ئیسلامێ بەحەشت یا لسەر وی موسلمانی حەرامکری یێ معاهدەکێ کافر بکوژت!

ئیسلام ژ هندێ گەلەک مەزنترە کو هوسا بکورتی بەحسێ جوانی وتایبەتمەندیێن وێ بکەی دڤێ لەزاتیێدا بەلێ ئەڤە چپکەک بوو ژوێ دەریایا مەزن . 
والحمدلله رب العالمین

نڤێسین: احمد بن یوسف السید
وەرگێران: شیڤان شێخەمیری

2.12.2021ز 27.4.1443مش