خەلاتێ خودێ (ئەحکامێت ڕوژا جەژنێ)

بەرهەڤکرن: م. شیڤان شێخەمیری

ژ بەرهەمێن سایتێ مزگەفت

مە موسلمانا د ئیسلامێ دا بتنێ دوو جەژن یێت هەین، کۆ سالانە موسلمان تێدا دلخۆش دبن بڤان ڕوژێن پیروز، و هەر ئێک ژ ڤان دوو جەژنا ژی پشتی بجهئینانا ئێک ژ فەرز و ڕوکنێت ئیسلامێ دهێن، ئەو ژی جەژنا ڕەمەزانا پیروز پشتی گرتنا هەیڤەکا تمامە ژ ڕوژیێن ڕەمەزانێ و ئەو هەیڤا کۆ شەڤا (ليلة القدر) تێدا، و جەژنا قوربانی ژی پشتی بجهئینانا فەرزا حەجێ دهێت کۆ ئەو ڕوکنێ ڕاوەستیانا ل سەر چیایێ عەرەفێ تێدا دەمێ خودێ مەزن شانازیێ ب عەبدێن خو دبەت ل نک مەلائیکەتا، و ئەڤە هەردوو ژ ڕوکنێن ئیسلامێنە ، وەک دیاری و خەلات و دلخوش کرن خودایێ مەزن ب بەندەیێن خۆ بەخشینە.
بەلێ جەژن ب ڕامانا خلاس بوون و دەرکەتنا ژ عیبادەتان و دویر کەفتنا ژ ڕەوشتێ جوان و ئادابا نینە، بەلکی هەتا ڕوژێن خۆشی و شادی و جەژن ژی ئەحکام و ئادابێن خو یێت هەین ، چونکی ئیسلام یا ڤەگرە بۆ هەمی بوارێن ژیانێ و چ تشت پشتگۆهڤە نە هاڤێتینە، لەورا ئەڤ پەرتۆکە ب گشتی بەحس ل ئادابێن جەژنێ و سوننەتێن وێ و نڤێژا جەژنێ و کومەک بابەتێن دی یێن فقهی و هندەک کارێن خەلەت یێن خەلک دکەن د جەژنێ دا و چەندین بابەتێن دی ب کورتی و ب بەڵگەڤە هاتینە ڕوونکرن.