بەرسڤ:

هەر ڪەسەڪێ ب مریت و موسلمان بیت و مووەحد بیت (عیبادەتێ خودێ ب تنێ بڪەت) دوماهیا وی بو بەحەشتێ یە.

و ئەڤ ڪەسێن داخلی بەحەشتێ دبن دوو جورن:

١_هندەڪ ژ وان هەر ژ دەستپێڪ دچنە بەحەشتێ، و قەت تام ناڪەنە عەزابێ و ئاگری (خودێ مە ژ وان حساب بڪەت).

٢_و هندەڪ ئەون ل دەستپێڪ دێ چنە جەهنەمێ هندی گونەهێن خو دێ عەزابێ خون و پاشی دێ ژ جەهنەمێ هێنە دەرێخستن بو بەحەشتێ، و ئەڤە ئەون یێن ڪو زانایان ناڤێ وان ڪرییە: (عصاة الموحدین_ گونەهڪارێن مووەحدان) یان (أهل الڪبائر من الموحدین_ خودانێن گونەهێن مەزن ژ مووەحدان)

ڤێجا ئەوێ مەیێ ڤەخوت و غەیری وی ژی ژ وان یێن گونەهێن مەزن دڪەن، ئەگەر تەوبە نەڪەن ژ گونەهێن خو، ئەو یێ ل سەر مەترسییەڪا مەزن، و گەفەڪا دژوار یا ل وان هاتییە ڪرن ب چوونا جەهنەمێ، و ئەگەر چوونە جەهنەمێ پشتی عەزابێ دخون دێ ژ جەهنەمێ دەرێخن و چنە بەحەشتێ.

و بلا ئەڤ چەندە ڪەسەڪێ د سەردا نەبەت ڤێجا سستیێ د بێ فەرمانیا خودێ دا بڪەت، ب هیڤیا هندێ ڪو هەر و هەر نامینتە د ئاگری دا، ئەگەر خودێ تعالی گرت گرتنا وی یا دژوارە، و عەزابا وی یا مەزنە مروڤ خو ل بەر ناگریت.

و ئەگەر تە ڤیا ڤی تشتی بزانی: خو بهاڤێژە د چالەڪا ئاگرێ دونیایێ دا، سالەڪێ، یان هەیڤەڪێ، یان هەتا روژەڪێ، کا دێ شێی وەڪەی؟ و دێ شێی خو ل بەر گری؟!

ڤێجا ڪا ئاگرێ دونیایێ پێش چریسڪەڪا یێ ئاخرەتێ ڤە، خودێ مە ژ ئاگری ب پارێزیت و ب مننەتا خو مە ژێ ب سلامەت بڪەت.

و پشتی هنگێ ژی ما ڪی دبێژیت خودانێن ڤان گونەهێن مەزن دێ میننە ل سەر تەوحیدێ؟

ما ڪی نابێژیت ئەڤ گونەهە ببنە ئەگەر ئێدی ل سەر تەوحیدێ ژی نەمینن و ڤێجا ببنە ئەگەر ئیمانێ ژی ژ دەست بدەن.

ژ خودێ دخازین رەحما خو ب سەر مەدا بەردەت.

ژێدەر:

https://islamqa.info/ar/218149