بەرسڤ:

ب ناڤێ خودایێ مەزن و دلۆڤان. 

ئەڤ بابەتە ـ بارک اللە فیکم ـ پێدڤی ب ڕۆهنکرنەکا زێدەترە: ئەگەر کەسەک ژ وان دۆکانا تشتان بکڕیت بێ کو مەرەما وی کڕینا تشتان بیت و ژبەر پشککێشانێ و دیارییان بیت، هۆسان دورست نینە، یان ژی خودانی دۆکانێ بهایێ تشتان بلندتر لێ کر ژ بهایێ وێ و تشت زێدەتر فرۆت، ئەڤە ژی دورست نینە، چونکی ل وی دەمی دێ بکڕ تشتی ب دەستڤە ئینیت یان ژی دێ ژ دەست دەت و ب ڤی ڕەنگی دبیتە قومار. بەلێ پا ئەگەر بکڕی تشت کڕی و بهایێ وی ژی بلند نەبوو و کارتێ ژی ب دیاری وەرگریت و چو بها ل سەر نەبیت، ل وی دەمی یا دورستە و چو تێدا نینە، چونکی بکڕ ل وی دەمی یان دێ بەت یان ژی چو ژ دەست نادەت و زیان ڤێ ناکەڤیت، ئەگەر ب مەرج ژی بهێتە کرن کو بڕەکا دەستنیشانکری یا تشتان بکڕیت، ل وی دەمی چو تێدا نینە و دورست. لەوما دبێژم: ئەگەر کەسەکی تشت کڕین ب تنێ ژبەر دیارییێ، ل وی دەمی دورست نینە و حەرامە، لەوما دێ مە گوهـ لێ بیت هندەک کەس سەتلا ماستی دکڕن و پێدڤی ژی پێ نینە، دێ بێژن بەلکی بۆ مە دیاری دەرکەڤیت، ئەڤە دروست نینە، ژ بەر کو یێ پارێ خۆ دمەزێخیت و پووچ دکەت ژ قەستا بێ کو چو مفایەک بگەهیتێ، لەوما ل دووڤ ڤێ چەندێ دشێین بێژین:

یا ئێکێ: ئەگەر تشت کڕی ب تنێ ژبەر دیارییێ، ل وی دەمی یا حەرامە و نە دورستە.

یا دویێ: ئەگەر بهایێ تشتان ل دەمێ دیارییێ بلند کر، ئەڤە ژی حەرامە و نە دورستە.

یا سیێ: ئەگەر تشتەک کڕی و پێدڤی یا پێ هەی و بهایێ وی ژی بلند نەکر بیت، هۆسان دورستە و حەلالە، چونکی ل وی دەمی دێ دیاری بۆ دەرکەڤیت یان ژی نە و ئەگەر بۆ نەدەرکەت ئەو وی پارێ زێدەتر نەدایە و زیان ڤێ نەکەتییە و ئەگەر بۆ وی دەرکەت ژی ئەو وی تشتەک ب دەست خۆڤە ئینا.

ژێدەر: سلسلة لقاءات الباب المفتوح > لقاء الباب المفتوح [90] الشیخ (محمد بن صالح العثیمین) رحمه الله تعالى.