بەرسڤ:

پاش ئێخستا مەهرێ دورستە، بەلێ دڤێت زەلام بزانن کو ئەو دەینەکە ل سەر ملێن وی و نابیت زەلام ئنییەتا هندێ هەبیت کو نەدەت و زولمێ ل خێزانا خۆ بکەت، بەلکو دڤێت هەر دەمێ وی شیان هەبن بدەت وەکی هەر دەینەکێ دی، چونکی ئەو حەق و مافێ خێزانا وییە ئیللا ئەگەر خێزانا وی ب حەزکرنا خۆ و بێ تەعدایی و گەفلێکرنێ گەردەنا وی ئازا بکەت و مەهرا خۆ بدەتێ بۆ کڕینا ترۆمبێلێ یان خانی یان هەر تشتەکێ دی کو پێدڤییا پێ هەی بۆ ب ڕێڤەبرنا ژیانا وان د ڤی دەمی دا ئاساییە. هەروەسا پرسیار ژ زانایێ هێژا شێخ "عبدالعزیز بن عبدللە بن باز" رحمە اللە، هاتییە کرن، ئەرێ حۆکمێ پاش ئێخستنا مەهرێ د ئیسلامێدا چییە؟

د بەرسڤێ دا گوت: پاش ئێخستنا مەهرێ دورستە، ل سەر وێ ڕێککەفتنا کو ڕێککەفتینە ل سەر، بۆ نموونە نیڤەکێ ل دەستپێکێ دێ دەت و نیڤا دی ژی ل دەمەکێ دی یان هەمییێ ل دەستپێکێ دێ دەت یان هەمییێ ل دووماهییێ دێ دەت، بەلێ پێدڤییە پابەند بی ب وان مەرجێن کو ئەو ژنە بو هاتییە حەلال کرن ئانکو مەهرا وێ ژبەر وێ فەرموودەیا پێغەمبەری سلاڤ لێ بن کو دبێژت: (أَحَقُّ مَا أَوْفَيْتُمْ مِنَ الشُّرُوطِ أَنْ تُوفُوا بِهِ مَا اسْتَحْلَلْتُمْ بِهِ الْفُرُوجَ) رَوَاهُ الْبُخَاري رَقَمْ: (515) وَ مُسْلِمْ رَقَمْ: (3537)..

ئانکو: گرنگترین مەرج، کو پێدڤییە بهێتە جێبەجێکرن ئەو مەرجە، کو دەهمەنا خێزانا تە بۆ تە پێ هاتییە حەلال کرن.

ابن باز، فتاوی ٳسلامیە للمسند(۳/۱۷۷).