بەرسڤ:

مەرەم ژ ژن ئینان و شویکرنێ دروستکرنا خێزانەکا بەختەوەرە نە (کرین و فروتنا کچێ و پەیداکرنا پارەیە پێ) !!!

ب ڕاستی د ئیسلامێ دا کچ گەلەك ژ هندێ ب قەدر و ب بهاترە کو ب پارەی یان زێری و تشتێن ب بها بهێتە کێشان، ژبەر هندێ دڤێت ئەوێ بزانین کو ئەو مەهرا بۆ کچێ ددانن ل دەمێ د دەنە شوی نە بهایێ کچێ یە بەلکی دیاری و بە خشیشەکە بۆ کچێ دهێتە پێشکێشکرن بوو هندێ دلێ وێ پێ خوش بکەت و هندەك تشتان پێ ب کریت وەکی زێر و جلوبەرگا بۆ هندێ دا خۆ پێ بخەملینیت چونکی ئافرەت گەلەك حەژ تشتێن خەملاندی و جوان و نازک دكەت و ئەڤەژی تشتەکێ سروشتییە وەکی خودایێ مەزن گوتی: {أَوَ مَن یُنَشَّؤُا۟ فِی ٱلۡحِلۡیَةِ وَهُوَ فِی ٱلۡخِصَامِ غَیۡرُمُبِينٍ} [الزخرف: ۱٨]

و بەلگەژی بۆ هندێ کو مەهر دیاری و بەخشیشە نە بهایێ کچێ یە خودایێ مەزن یاگوتی: {وَءَاتُوا۟ ٱلنِّسَاۤءَ صَدُقَـٰتِهِنَّ نِحۡلَةࣰۚ} [النساء:٤ ] [نحلة: اي هدية] 

ڕامان: مەهرا ژنا ب دەنێ وەکی دیاری.

و پیڤەر بۆ شویدانا ئافرەتێ پێکهاتییە ژ دین و ڕەوشتی، نە پارە و ناڤ و دەنگ و پلە و پایە، 

پێغەمبەرێ خودێ ﷺ گوتییە: "إذا جاءَكُم من تَرضونَ خلقَهُ ودينَهُ فزوِّجوهُ فإلَّا تفعَلوا تَكُن فتنةٌ في الأرضِ وفَسادٌ [عريضٌ]" [صحيح سنن الترمذي رقم: (١٠٨٤)].

ڕامان: ئەگەر کەسەك هاتە خازگینییێن کچێن هەوە و هوین ژ دین و ڕەوشتێ وی ڕازی بوون کچێن خۆ ب دەنێ، ئەگەر هوین وەنەکەن دێ فیتنە و خڕابی و فەساد و بێ ڕەوشتییەکا مەزن د ئەردی دا ڕویدەت.

ئیسلام گەنجان پاڵددەت بۆ ژن ئینانێ بۆ هندێ دا خۆ ژ گونەهان بپارێزن وەکی پێغەمبەرێ خودێ ﷺ دبێژیت: "يا مَعْشَرَ الشَّبَابِ، مَنِ اسْتَطَاعَ مِنْكُمُ البَاءَةَ فَلْيَتَزَوَّجْ، فَإِنَّهُ أَغَضُّ لِلْبَصَرِ وَأَحْصَنُ لِلْفَرْج" [صحيح سنن النسائي رقم: (٢٢٤٢)] .

ڕامان: ئەی گەلی گەنجان هەرئێك ژ هەوە شیانا پێك ئینانا هەڤژینییێ هەبیت بلا بينيت چونکی دبیتە ئەگەرێ چاڤ گرتنێ ژ بەرێخودانێ و دەهمەن پاڕاستن ژ دەهمەن پیسی و خڕابیێ.

ژبەر هندێ پێدڤییە هاریکاریا گەنجان بهێتە کرن بوو ژن ئینانێ ب هەمی ڕێکێن شەرعی، ئێك ژ وان تشتا ئەوە کو مەهرا وێ ل سەر گەلەك گران نەکەن داکو بشێن ژنێ بینن و خێزانەکا دیندار و ب ڕەوشت و بەختەوەر پێك بینین.

و ساناهیکرنا شویدانا کچێ و کێم کرنا مەهرا وێ نیشانا بەرەکەتێ و خێر وباشییا وێ کچێ یە وەکی پێغەمبەری ﷺ دبێژت: "إنَّ من يُمنِ المرأةِ تيسيرُ خِطبتِها وتيسيرُ صداقِها" [صحيح الجاميع الصغير رقم: (٢٢٣٥)].

ڕامان: ب ڕاستی بەرەکەت یا د هندێ دا کو خوازگینی و شویدانا وێ ب ساناهی بێخن و مەهرا وێ یاسڤك و کێم بیت.

و پێدڤییە ڤێ ژی ب زانین کو ئەڤە بهایێ ئافرەتا کێم ناکەت بەلکی هاریکاریا وان ژی یە بۆ شویکرنێ و ڤەحەویان د ماڵێن خۆ دا چونکی مافێ وێ یە ئەو ژی بچیتە مالا خۆ ئارام ببیت ب ژیانا هەڤژینییێ. 

ئەگەر کارێ وان ب ساناهی نە ئێخن بۆ پێك ئینانا هەڤژینیێ بەروڤاژی دێ کچ و کور ژی بەرێ خودەنە کارێن حەڕام.

ژێدەر: پەرتووکا وەڵامی ڕاست و دروست بۆ ژن و مێردی خوا پەرست - ژ بەرهەمێن سایتێ بەهەشت

(مامۆستا محمد عبدالرحمان)